काठमाडौं,१५ भदौ । नेकपा माओवादी केन्द्रले सत्ता साझेदार दल नेपाली कांग्रेससँग कुनैपनि खटपट नभएको दाबी गरेको छ ।
शनिबारबाट माओवादी केन्द्रले सुरु गर्न लागेको तीन महिने विशेष अभियान ‘जनतासँग माओवादी ’ को बारेमा जानकारी दिन आयोजित पत्रकार सम्मेलनमा पार्टीका प्रवक्ता एवं उपाध्यक्ष अग्नी सापकोटाले बजारमा हल्ला गरिए जस्तो आफूहरुबीच कुनैपनि खटपट नभएको दाबी गरे ।
केही दिनअघिको संसद् बैठकमा कांग्रेस महामन्त्री गगन थापाले प्रधानमन्त्रीले उठाएको विषयबारे सञ्चारकर्मीको जवाफमा खटपट भएको संकेत गरेपछि आज सापकोटाले त्यस्तो बताएका हुन् ।
“एउटा सांसदले उहाँलाई के लागेर त्यस्तो कुरा गर्नुभयो,” उनले भने, “राजनीतिमा कुन क्षण के हुन्छ भन्न सकिँदैन । मैले बुझेसम्म गठबन्धनमा कुनै समस्या आउँदैन । कांग्रेस र माओवादीका बीचमा त खटपट परेको छैन ।”
