काठमाडौं,१५ भदौ । आगामी भाद्र २९ गतेबाट प्रदर्शनको तयारीमा रहेको सिनेमा ‘एक भगवत् गीता’को ट्रेलर सार्वजनिक गरिएको छ।
शुक्रबार राजधानीमा आयोजित एक कार्यक्रमका बीच सार्वजनिक सिनेमाको २ मिनेट ५१ सेकेण्ड लामो ट्रेलर मर्मस्पर्शी र सशक्त लाग्छ।
अल्पसंख्यक लैंगिक समुदाय र मधेशको कथावस्तुमा निर्माण भएको सिनेमाले विभेद, समानता र न्यायको सन्देश दिने प्रयास गरेको छ।
सुनिलकुमार थापा प्रोडक्सनले निर्माण गरेको फिल्ममा विपिन कार्की, धिरज मगर, सुहाना थापाको अलावा अनुराग कुँवर, कबीर खड्का, जेविस श्रेष्ठ, जेविन श्रेष्ठ, संजोग रसाइली, मुकेश झा, राम कैलाश ठाकुर, धीरज ठाकुर, सुरेन्द्र राय, गंगाकान्त झाको अभिनय छ ।
यही भदौ २९ गतेबाट प्रदर्शनमा आउन लागेको फिल्ममा कन्सेप्ट सुहाना थापा र कथा झरना थापाले तयार गरेका हुन्, राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व छ । फिल्मकी निर्माता अभिनेत्री सुहाना हुन् ।
