काठमाडौं,५ असोज । शिक्षा विधेयकको विरोधमा आन्दोलनमा होमिएका शिक्षक र सरकारबीच आजै पुनः वार्ता हुने भएको छ ।
बुधबारदेखि दशैभरका सामूदायिक विद्यालय बन्द गरेर राजधानी केन्द्रीत आन्दोलनमा उत्रिएका शिक्षक र सरकारबीत बिहीबार पनि वार्ता भएको थियो । तर, उक्त वार्तामा कुनै सहमति हुन सकेन् । आजबिहान फेरि वार्ता हुने भनिएपनि सरकारले औपचारिकरुपमा वार्ता आव्हान नगरेपछि शिक्षकहरु वार्तामा गएका थिएनन् । शिक्षकहरु वार्तामा नआएपछि सरकारले आजै औपचारिक पत्र लेखेर वार्ताको लागि आव्हान गरेको आन्दोलनको नेतृत्व गरिरहेको नेपाल शिक्षक महासंघले जनाएको छ ।
आजै कार्यवाहक प्रधानमन्त्री पूर्णबहादुर खड्कासहित, उपप्रधान तथा गृहमन्त्री नारायणकाजी श्रेष्ठ, कानूनमन्त्री धनरजा गुरुङ, शिक्षामन्त्री अशोक राई र सञ्चारमन्त्री रेखा शर्माले आन्तरिक छलफल गरेका थिए ।
सरकारले औपचारिक वार्ताका लागि आव्हान गरेपछि शिक्षक संघले पनि आन्तरिक छलफल थालेको छ । गत हप्ता संसद्मा दर्ता भएको विधेयकलाई लिएर शिक्षकहरु रुष्ट बनेका छन् ।
शिक्षक महासंघले अस्थायी प्रकृतिका शिक्षकलाई विगतका सहमतिका आधारमा स्थायी गर्नुपर्ने, विद्यालय कर्मचारीको दायीत्व संघीय सरकारले वहन गर्नुपर्ने, इसिडि शिक्षकलाई प्राथमिक तृतीय शिक्षक सरहको दरबन्दीमा लैजानुपर्ने, संघीय शिक्षा ऐन जारी हुनुभन्दा अगाडि नियुक्त भएका शिक्षकहरूको हकमा पुरानै प्रणाली अनुसार पेन्सन हुनुपर्ने, अस्थायी प्रकृतिका शिक्षक स्थायी भएमा पेन्सन प्रयोजनका लागि अस्थायी सेवाअवधि गणना हुनुपर्नेलगायतका माग अघि सारेको छ।
