काठमाडौं, २२ पुस । नेपाली कांग्रेसले कोशी प्रदेशबाट पार्टीका पूर्वमहामन्त्री कृष्णप्रसाद सिटौलालाई उम्मेदवार बनाउने भएको छ । कोशीमा रिक्त हुने दुई सिटमा गठबन्धन दलले एक सिट कांग्रेसलाई र अर्को एक सिट नेकपा (माओवादी केन्द्र) लाई दिएको थियो । माओवादीले कोशीमा चम्मादेवी कार्कीलाई उम्मेदवार बनाएको छ ।
कांग्रेसले पाएको १० सिटमा अहिलेसम्म उम्मेदवार टुङ्ग्याउन सकेको छैन । सभापति शेरबहादुर देउवाबाट ग्रिन सिग्नल पाएका सिटौला उम्मेदवारी दर्ता गराउन केही समयअघि विराटनगर जान हिँडिसकेका छन् । कोशीमा गगन–शेखर पक्षबाट डा. मिनेन्द्र रिजालको पनि दाबी थियो । प्रधानमन्त्री पुष्पकमल दाहाल ‘प्रचण्ड’ ले पनि सिटौलालाई टिकट दिन देउवालाई सिफारिस गरेको बताइएको छ ।
