काठमाडौं,१२ माघ । नेपालले आईसीसी यू-१९ विश्वकप २०२४ मा आफ्नो समूह चरणको अन्तिम खेलमा अफगानिस्तानसँग खेलिरहेको नेपालले चौथो सफलता प्राप्त गरेको छ । नेपालले ७।६ अोभरमा सोहिल खानको विकेट चौथो विकेटको रुपमा लिएको हो । उनलाई आकाश चन्दले आउट गरेका छन् । ४ रन बनाएर खेलिरहेका उनी कप्तान देव खनालको हातबाट क्याच आउट भएका छ्न ।
यसअघि तीव्र गतिका बलर गुलशन झाको पहिलो ओभरको चौथो बलमा अफगानिस्तानका ओपनर नौमान साह टप एज लागेर दीपक डुम्रेबाट क्याच आउट भए । आकाश चन्दको दोस्रो ओभरको तेस्रो बलमा एज लागेर खलिद टनिवाल विकेटकिपर विपिन रावलबाट क्याच आउट भए । दुबै ब्याटर शून्यमा आउट भएपछि अफगानिस्तान दबाबमा परेको छ । त्यस्तै छैटौं ओभरमा पुनः आकाशले ओपनर जमसिद जार्डनको विकेट लिँदै नेपाललाई शानदार सुरुआत दिलाएका छन् । उनी ३ रनमा आउट भएका थिए ।
बफेलो पार्क इस्ट लन्डनमा टस जितेर पहिला ब्याटिङ रोजेको अफगानिस्तानले ८ ओभरमा ४ विकेट गुमाउँदै २८ रन बनाएको छ ।
नेपालले आजको खेलमा टोलीमा दुई परिवर्तन गरेको छ । दीपक बोहरा र तिलकराज भण्डारीलाई खेलाएको छ ।
दुबै टोली समूह ‘डी’ मा अंक विहीन छन् । यस खेलको विजेता टोली सुपर सिक्स र पराजित हुने टोलीले १३ देखि १६ औं स्थानको लागि प्लेअफ खेल्नुपर्ने हुन्छ ।
