काठमाडौं, १५ माघ । राष्ट्रिय प्रजातन्त्र पार्टीका अध्यक्ष राजेन्द्र लिङदेनले राजालाई सरापेर राजनीति गर्ने दिन सकिएको दाबी गरेका छन् ।
पूर्व राजा ज्ञानेन्द्र शाहले दरबार हत्याकाण्डबारे दिएको जवाफपछि राजनीतिक दलका नेताले दिएको प्रतिक्रयापछि अध्यक्ष लिङदेनले अब राजालाई गाली गर्ने होइन गणतन्त्रको डेढ दशकमा देशले राष्ट्रियता, सुशासन, विकास, सेवा प्रवाह र रोजगारी जस्ता विषयमा के कस्ता उपलब्धिहरू प्राप्त गर्न सक्यो त्यो देखाउन सक्नु पर्यो भन्दै प्रश्नसमेत तेर्साएका छन्।
मौका मिले त्यही राजा ठिक हुने नमिले बेठिक हुने प्रवृत्ति दल र नेतामा रहेको उनको बुझाई छ। ‘राजा ठिक थिएनन् त, अनि त्यही राजालाई लाइन लागेर दाम चढाउन किन गएको ? उनले सामाजिक सञ्जालमा प्रश्न गरेका छन्।
दलहरूले आफ्नो कमजोरी छोप्न राजालाई दोष दिन खोजेको उनको आरोप छ। ‘जहिले दरबार हत्याकाण्डको विषय तेर्स्याएर राजालाई बदनाम गर्न र राजाप्रति घृणा पैदा गर्न खोज्नेहरूले आफ्नो शासनको यो लामो समयमा राजालाई दोषी प्रमाणित गर्न किन नसकेकोरु सामाजिक सञ्जालमा उनले प्रश्न गरेका छन्, ‘जनतालाई सधैँ मूर्ख बनाउन सकिन्न भन्ने समयमै बुझौँ१ लिङदेनले दरबार हत्याकाण्डमा आफ्नो प्रियजन गुमाएर बाँचेका दर्जनौँ जीवितहरू छन् उनीहरूलाई किन नसोधेको ? उनले भनेका छन् ।
शनिबार वीरगञ्जमा आयोजित कार्यक्रममा पूर्व राजा शाहले दरबार हत्याकाण्डबारे आफू र आफ्नो परिवारलाई पीडा दिनेगरी टिप्पणी र आरोप लगाईएको भन्दै गुनासो गरेका थिए । पूर्व राजाले दरबार हत्याकाण्डको २२ वर्षपछि मुख खोलेपनि विभिन्न राजनीतिक दलका नेताहरुले प्रतिक्रिया जनाइरहेका छन् ।
