काठमाडौं, २५ माघ । नेपाली कांग्रेसका नेता, पूर्वमन्त्री एवं प्रतिनिधि सभा सदस्य ज्ञानेन्द्र बहादुर कार्कीले अख्तियारमा सुटुक्क पुगेर बयान दिएका छन्। नेपाल दूरसञ्चार प्राधिकरणको टेलिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम (टेरामक्स) खरिद प्रकरणमा मुछिएका नेता कार्की अख्तियारले पटक–पटक ताकेता गर्दा पनि बयानका लागि गएका थिएनन् । अन्ततः पक्राउ गरेर भएपनि बयान लिन अख्तियारको रणनीति थाहा पाएका कार्कीले सुटुक्क अख्तियार पुगेर बयान दिएका हुन् ।
टेरामक्स प्रकरणमा मुछिएका सबै कर्मचारीहरुले बयान दिइसक्दा पनि कार्कीले भने अटेर गरेर बसेका थिए । त्यस्तै, सोही प्रकरणमा मुछिएका बहालवाला स्वाथ्यमन्त्री मोहन बहादुर बस्नेत अझै बयान दिन गएका छैनन् ।
अख्तियारमा परेको उजुरीमा कल बाइपास रोक्न र राजस्व चुहावट नियन्त्रण गर्न टेरामक्स प्रविधि खरिद गर्दा डेढ अर्ब रूपैयाँ अनियमितता भएको उल्लेख छ ।
अख्तियारसँग डराइ–डराइ हिँड्नुपर्ने अवस्था सिर्जना भएपछि उनी आफन्त र पार्टीका नेताहरुकै सल्लाहमा बयान दिन गएको बताइएको छ । यसअघि बयानका लागि अख्यिारले ताकेता गर्दा अहिले पूर्व भएको जानकारी गराएको र धेरैजसो समय सम्पर्कमै नआएको अख्तियार स्रोतको दाबी छ ।
