काठमाडौं, १ फागुन । विवादित मेडिकल व्यवसायी दुर्गा प्रसाईँ नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानले आफ्नो प्रथम वार्षिकोत्सव तामझामका साथ मनाएको छ । आज (मंगलबार) काठमाडौंको भृकुटी मण्डपमा विशेष कार्यक्रम आयोजना गरेर प्रथम वार्षिकोत्सव मनाइएको हो । उक्त कार्यक्रममा देशका विभिन्न ठाउँबाट समर्थकहरुको उपस्थिति थियो ।
प्रसाइँले आजको कार्यक्रममा पूर्वराजा ज्ञानेन्द्र शाहलाई नागरिक अभिनन्दनमा सहभागी भइदिन आग्रह गर्दै विन्तिपत्र समेत चढाएका थिए । तर, पसाईँको कार्यक्रम छल्न ज्ञानेन्द्र सपरिवार चितवनतर्फ गए । त्यस्तै, उनले, राजा र हिन्दु राष्ट्रको वकालत गरिरहेको राष्ट्रिय प्रजातन्त्र पार्टीबाट पनि सहयोगको अपेक्षा राखेका थिए । राजा र राप्रपा दुवैबाट असहयोग भएपछि प्रसाईँले आजको कार्यक्रम तामझामसहित गरेर आफैं राजर्शी शैलीमा प्रस्तुत भएका थिए ।
प्रसाईँ लक्जरियस गाडीमा सवार थिए । उनका समर्थकहरुले उनलाई मानव साङ्लो बनाएर सुरक्षा दिँदै भृकुटीमण्डपको कार्यक्रम स्थलमा प्रवेश गराएका थिए । उनले गाडीबाटै आफ्ना समर्थकहरुलाई हात हल्लाएर हौसल्ला प्रदान गरिरहेका थिए । त्यस्तै, परेवा उठाएर उनले उनले कार्यक्रमको सुरुवात गरे ।
प्रसाईँले यसअघि गत मंसिर ७ गते बल्खुमा शक्ति प्रदर्शन गरेका थिए । उक्त समयमा देशका विभिन्न स्थानबाट १० देखि १२ हजारका समर्थकहरु सहभागी भएको सुरक्षा निकायको आँकलन थियो । आजको कार्यक्रममा भने समर्थकहरुको सहभागिता पहिलाको जस्तो रहेन । आज लगभग २ हजार ५ सयदेखि ३ हजार समर्थकहरु सहभागी भएको आँकलन छ । प्रसाईँको उक्त कार्यक्रममा सुरक्षा व्यवस्था पनि निकै कडा थियो । नेपाल प्रहरी, सशस्त्र प्रहरी बलले सुरक्षा दिएका थिए । राष्ट्रिय अनुसन्धानसहितका कर्मचारीको सहभागिता रहेको थियो । Photo By: Mukunda Kalikote/RN
