काठमाडौँ, १ फागुन । राजधानीमा आजदेखि सुरु भएको नेपाल कम्युनिष्ट पार्टी (माओवादी केन्द्र) को प्रथम विधान अधिवेशनमा २० समूह बनाएर छलफल थालिएको छ ।
सहभागीमध्येबाट एक समूहमा ५० देखि ५५ जना छुट्टयाइएर विधान मस्यौदमा छलफल प्रारम्भ गरिएको महासचिव देवप्रसाद गुरुङले जानकारी दिए ।
भोलि बुधबार अपराह्न १ बजेसम्म छलफल गरी आफ्नो समूहको निष्कर्ष अधिवेशनमा प्रस्तुत गर्नुपर्ने उहाँले जानकारी दिनुभयो । २० वटै समूहबाट प्राप्त सुझावका आधारमा विधानलाई अन्तिम रुप दिइनेछ ।
तीन दिनसम्म सञ्चालन हुने सम्मेलनमा एक हजार दुई सयभन्दा बढी प्रतिनिधिको सहभागिता छ । सम्मेलनमा केन्द्रीय सदस्य, वैकल्पिक केन्द्रीय सदस्य, तीन केन्द्रीय आयोगका सदस्य, सात भौगोलिक र तीन गैरभौगोलिक प्रदेशका पदाधिकारी तथा जनवर्गीय सङ्गठनका पदाधिकारीको सहभागिता छ । एउटा समूहमा सहभागीमध्येबाट ५० देखि ५५ जना रहने र समूहमा भएको छलफलको निष्कर्ष टोली नेताहरुले हलमा पेस गर्नेछन् । समूहहरूले प्रज्ञाभवनको हल, नाचघर जमलको हल र पार्टी कार्यालय पेरिसडाँडामा मस्यौदा विधानमाथि छलफल गर्नेछन् ।
यी हुन् २० समूहका टोली नेता
समूह १ : अञ्जना विशंखे
समूह २ : अमृता थापा
समूह ३ : ओनसरी घर्ती
समूह ४ : कमला रोका
समूह ५ : काली बहादुर मल्ल
समूह ६ : कुल प्रसाद केसी
समूह ७ : खगराज भट्ट
समूह ८ : गणेश मान पुन
समूह ९ : जयपुरी घर्ती
समूह १० : जोखबहादुर महरा
समूह ११ : नारायणप्रसाद दाहाल
समूह १२ : परशुराम तामाङ
समूह १३ : पूर्णकुमारी सुवेदी
समूह १४ : प्रह्लाद बुढाथोकी
समूह १५ : महेश्वरजंग गहतराज
समूह १६ : विश्वनाथ साह
समूह १७ : यशोदा सुवेदी
समूह १८ : शशी श्रेष्ठ
समूह १९ : सत्य पहाडी
समूह २० : हकिकुल्ला खाँ
