काठमाडौं,२३ फागुन । नेपाली कांग्रेसका सभापति तथा पूर्व प्रधानमन्त्री शेरबहादुर देउवा नेकपा एकीकृत समाजवादीका अध्यक्ष माधवकुमार नेपाललाई भेट्न नेपालको निवास पुगेका छन् ।
नेपाललाई भेट्न देउवा पत्नी आरजु राणासहित माधव निवास पुगेका हुन् । देउवाले मंगलबार साँझ नेपाललाई फोन गरेर आफू भेट्न आउने जानकारी गराएका थिए ।
बिरामी भएर घरमै स्वास्थ्य लाभ गरिरहेका अध्यक्ष नेपाल भेट्न सभापति देउवासहितका नेता पुगेका हुन् ।
राजनीतिक समीकरण बदलिएसँगै नेताहरूको दौडधुप जारी छ। मंगलबार साँझ प्रधानमन्त्री पुष्पकमल दाहाल, नेकपा एमाले का अध्यक्ष केपी शर्मा ओली नेपाल भेट्न कोटेश्वर पुगेका थिए।
प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले कांग्रेस र एकीकृत समाजवादीसहितको गठबन्धन तोडेर नेकपा एमाले र रास्वपासहितको नयाँ गठबन्धन बनाएर मन्त्रिपरिषद पुनर्गठन गरेका छन् ।
नयाँ गठबन्धनमा माधव नेपाल नेतृत्वको एकीकृत समाजवादीलाई पनि सामेल गराउन एमाले र माओवादीका शीर्ष नेताहरु सक्रिय भएको बेला देउवाले नेपाललाई भेटेका हुन् । कांग्रेसले माधव नेपाललाई नयाँ गठबन्धनमा जानबाट रोक्ने प्रयासमा रहेको बुझिएको छ ।
नेपाललाई नयाँ गठबन्धनमा सहभागी गराउन ओली र दाहालको दौदधुप बढेको छ । देउवा साना दलसँग मिलेर नयाँ गठबन्धन बनाउन पहल गरिरहेका छन् ।
