काठमाडौं,२८ फागुन । राष्ट्रिय सभाको अध्यक्षका लागि दुई जनाले मनोनयन दर्ता गराएका छन् । संघीय संसद्को निर्वाचन कार्यतालिका अनुसार सोमबार संसद भवन नयाँ बानेश्वरमा नेपाली कांग्रेसका युवराज शर्मा र माओवादी केन्द्रका सांसद नारायण दाहालले अध्यक्ष पदमा उम्मेदवारी दर्ता गरेका हुन् ।
सत्ता गठबन्धनका उमेदवार दाहालको प्रस्तावमा माओवादीका गोपी सार्की अछामी र समर्थनमा एमालेका देवेन्द्र दाहाल, एकीकृत समाजवादीका बेदुराम भुसाल र जसपाका मोहम्मद खालिद छन् ।
त्यसैगरी नेपाली कांग्रेसको तर्फबाट अध्यक्षमा उम्मेदवारी दर्ता गरेका शर्माको प्रस्तावकमा कांग्रेसकै आनन्दप्रसाद ढुङ्गाना र समर्थकमा कांग्रेसका किरणबाबु श्रेष्ठ र लोकतान्त्रिक पार्टी (लोसपा) का शेखरकुमार सिंह छन् ।
सत्ता गठबन्धनमा भएको सहमति अनुसार माओवादीले अध्यक्ष र एमालेले उपाध्यक्ष लिनेछन् । राष्ट्रिय सभामा १८ सांसदसहित माओवादी सबैभन्दा ठूलो पार्टी छ। एमालेका १०, एकीकृत समाजवादीका ८ र जसपाका ३ जना सांसद छन्। यता कांग्रेसका १६ र लोसपाका १ सांसदले शर्मालाई मत दिनेछन् ।
प्रमुख प्रतिपक्ष दल नेपाली कांग्रेसका तर्फबाट राष्ट्रियसभा अध्यक्ष पदको उमेदवार बनेका युवराज शर्माले आफूले जितेको खण्डमा संसदीय सीमाभित्र रहेर काम गर्ने बताएका छन् । उमेदवारी दर्ता गराएपछि सञ्चारर्कीसँग प्रतिक्रिया दिँदै उनले लोकतन्त्रमा कसैको हारजित नहुने बताए ।
“लोकतन्त्रमा कसैको जित पनि हुन्न, कसैको हार पनि हुन्न । हारजित चुनावको सुन्दर पक्ष हो,” उनले भने ।
