Logo

बुटवल पुगेर सरकारविरुद्ध खनिए बाबुराम, अहिलेको सत्ता गठबन्धन ठगबन्धन भएको दाबी



बुटवल,९ वैशाख । नेपाल समाजवादी पार्टीका अध्यक्ष डा.बाबुराम भट्टराईले नेपालका पार्टीहरु उत्तर, दक्षिण र पश्चिममुखी भएकाले देशले निकास नपाएको बताएका छन् ।

आइतवार रिपोर्टर्स क्लव नेपाल लुम्बिनी प्रदेशले बुटवलमा गरेको साक्षात्कार कार्यक्रममा बोल्दै पूर्व प्रधानमन्त्रीसमेत रहेका डा भट्टराईले ठूलो त्याग र वलिदानले ल्याएको गणतन्त्र र लोकतन्त्रलाई बचाउन नसक्दा देशमा अस्थिरता र भ्रष्टाचार बढ्दै गएको बताए । उनले राजनीतिक दलहरुकै कारण देश र जनताको अवस्था निकै गम्भीर अवस्थामा पुगेको जिकिर गरे ।

देशमा अहिले चरम बेरोजगारी, बेथिति र उद्योग व्यवसायहरु धरासायी बन्दै गएकोप्रति वर्तमान सरकारले ध्यान नदिएको उनको आरोप छ । सरकारले खोल्न लागेका भ्रष्टाचारका ठूला फाईलहरुको हालसम्म कुनै टुङ्गोमा पुर्‍याउन नसकेको जनाउँदै सत्ता टिकाउन कसैलाई तर्साउने र कसैलाई बचाउने खेल मात्रै चलेको उनको दाबी छ ।

अध्यक्ष भट्टराईले भने ‘राजनीतिक भनेको देश लुट्ने अस्त्र बन्यो । चुनाबलाई महंगो बनाउने र नागरिकले दिएको भोटले जितेर त्यसको फाईदा विभिन्न नाममा भ्रष्टाचार गर्ने प्रवृत्तिले देश ठूलो भड्कालोमा जाँदैछ’ ।

देशमा उदाएका नयाँ शक्तीहरुको उपयुक्तता नहुने ठोकुवा गर्दै अब देशको विकासका लागि विभिन्न दिशामुखि दलहरु भन्दा देशलाई नेपालमुखि दल चाहिएकाले आफ्नो पार्टीलाई नयाँ बैकल्पिक पार्टी बनाउने दृढताका साथ अगाडि बढेको बताए ।

‘आफ्नो पार्टीलाई केही शक्तिहरुले धमिलो बनाउन खोजेका थिए । मैले ती तत्वहरुलाई प्रदूषित गराउनबाट बचाउन अलग गरिसके म अब आफ्नो पार्टीलाई नेपालमुखी बनाउनेमा कस्सिएको छु’ उनले भने ‘अहिलेको राजनीतिक गठबन्धन ठगबन्धन हो । यो गठबन्धन पहिले नै असफल भएकाले पटक पटक दोर्‍याएपनि सही मार्ग लिँदैन’ ।

नेता भट्टराईले सत्ताको लालाची आफु कहिल्यै नभएको खाबी गरे । ‘पदको निम्ति कहिल्यै पनि कसैसँग सम्झौता गरेको छैन् । न त मैले कुनै भ्रष्टाचार गरेको कुनै प्रमाण छ’ उनले भने ‘केही भुक्ने कुकुर छन् । ती भुक्ने कुकुरहरुलाई ढुङ्गा हान्ने भन्दा मेरो ध्यान आफ्नै बाटोमा लागेको छु । हामीहरुको एउटा माग छ त्यो हो, प्रत्यक्ष कार्यकारी राष्ट्रपतिको निर्वाचन प्रणाली । त्यसमा गयो भने मात्रै देशमा स्थायित्व सरकार आउने र विकास हुने विश्वास छ’ ।

कार्यक्रम रिपोर्टर्स क्लव नेपाल, लुम्बिनी प्रदेशका अध्यक्ष राम कुमार क्षेत्रीको अध्यक्षतामा सम्पन्न भएको थियो ।



प्रतिक्रिया दिनुहोस्

Screenshot