काठमाडौं,१२ चैत । राष्ट्रिय स्वतन्त्र पार्टी (रास्वपा) का उपसभापति डा स्वर्णिम वाग्लेले इलाम २ को निर्वाचन आफ्नो पार्टीले जितिसकेको दाबी गरेका छन् ।
वैशाख १५ गते हुने उपनिर्वाचनमा पार्टीका तर्फबाट उम्मेदवार रहेका मिलन लिम्बूलाई भोट माग्न इलाम पुगेका वाग्लेले बुधबार चुलाचुलीमा भएको कार्यक्रममा मिलनको जितको घोषणा गरेका हुन् । यद्यपि चुनाव आउन अझै तीन दिन बाँकीनै रहेको छ ।
‘राजनीति भनेको अंकगणितको मात्रै कुरा होइन, त्यसो त मतगणना हुन बाँकी नै छ तर हामीले चुनाव जितिसकेका छौँ’,वाग्लेले भने।
प्रतिनिधि सभा सदस्यसमेत रहेका वाग्लेले रास्वपाका उम्मेदवारबारे विभिन्न दलका नेताहरुले अफबाह फैलाएको दाबी गरे । उनले रास्वपाले उठाएको उम्मेदवार पहिचान विरोधी नभएको जिकि गर्दै भने ‘रास्वपा अहिलेको बिग्रिएको राजनीतिलाई संग्ल्याउन, आशाको राजनीति गर्नका लागि जनताको घरदैलोमा आएको हो । तर पुराना दलहरु उसको अभियानबाट अत्ताल्लिएका छन् । त्यसैले आरोप प्रत्यारोपमा उत्रिएका छन्’, ।
इलाम २ बाट निर्वाचित संविधान सभा अध्यक्ष तथा पूर्व सभामुख सुवासचन्द्र नेम्वाङको निधन भएपछि सो क्षेत्रमा उपनिर्वाचन हुँदैछ । उपनिर्वाचनका लागि मिलनसँगै नेकपा एमालेबाट सुहाङ नेम्वाङ, नेपाली कांग्रेसबाट डम्बर खड्का र स्वतन्त्रतर्फ डेकेन्द्रसिंह थेगिम लगायत १९ जनाले मनोनयन दर्ता गरेका छन् ।
