काठमाडौं,२ जेठ । जेठ ६ गते प्रतिनिधि सभामा प्रधानमन्त्री पुष्पकमल दाहाल प्रचण्डसँग प्रश्नोत्तर कार्यक्रम हुने भएको छ ।
प्रतिनिधि सभाको पाक्षिक क्यालेन्डरमा जेठ ६ गते प्रधानमन्त्रीसँग प्रश्नोत्तर कार्यक्रम सञ्चालन गर्ने उल्लेख छ । यसका साथै त्यसदिन लगानी सम्मेलनसँग सम्बन्धित अध्यादेश स्वीकृत गर्ने लगायतको सम्भावित कार्यसूची छ ।
प्रधानमन्त्री वा प्रधानमन्त्रीको कार्यक्षेत्रसँग प्रत्यक्ष रूपमा सम्बन्धित विषयमा प्रश्न सोध्नको लागि सभामुखले प्रत्येक महिनाको पहिलो हप्ताको कुनै एक दिनको बैठकको पहिलो एक घण्टा निर्धारण गर्ने व्यवस्था प्रतिनिधि सभा नियमावलीमा छ ।
त्यसअनुसार जेठ ६ गते प्रधानमन्त्रीसँग प्रत्यक्ष प्रश्नोत्तर कार्यक्रम राखिएको हो ।
सहकारी ठगी प्रकरणलाई लिएर प्रमुख प्रतिपक्षी दल नेपाली कांग्रेसले संसद्मा निरन्तर अवरोध गर्दै आएको छ । मंगलबार बसेको संसद्को दुवै बैठकमा अवरोध भएपछि भोलिसम्मका लागि बैठक सारिएको छ । कांग्रेसले सहकाररुी प्रकरणमा जोडिएका गृहमन्त्री रवि लामिछानेलाई कारबाहीको माग राखेर सदन अवरुद्ध गरिरहँदा ६ गते हुने प्रधानमन्त्रीसँगको प्रश्नोत्तर पनि हुने नहुने निश्चित छैन् ।
