काठमाडौं, ५ जेठ । प्रतिनिधि सभाका सभामुख देवराज घिमिरेले प्रधानमन्त्री पुष्पकमल दाहाल ‘प्रचण्ड’ र नेकपा (एमाले) का अध्यक्ष केपी शर्मा ओलीलाई भेटेर प्रमुख प्रतिपक्षी दलसँग सहमति गर्न सुझाव दिएका छन् । प्रधानमन्त्रीको सरकारी निवास बालुवाटारमा ओली–प्रचण्डसँग भएको संयुक्त बैठकमा सभामुख घिमिरेले अध्यादेशबाट अगाडि बढ्दा सदनको गरिमा घट्ने भन्दै सहमतिको विन्दु खोज्न सुझाव दिएका हुन् ।
जबरजस्ती रुपमा संसद् चलाएपनि भोलि कुनै विन्दुमा सहमति गर्नुभन्दा अहिले नै मध्यमार्गी बाटो खोज्न उनले आग्रह गरेका हुन् । भोलि ११ बजे प्रतिनिधि सभाका बैठक बस्ने कार्यतालिका रहेको छ । भोलि ११ बजे अगाडि नै प्रमुख प्रतिपक्षसँग सहमति गरेर सौहार्दपूर्ण ढंगबाट सदन चल्ने वातावरण बनाउन आग्रह गरेका छन् ।
प्रमुख प्रतिपक्षी दल नेपाली कांग्रेसले सहकारी ठगी प्रकरणमा राष्ट्रिय स्वतन्त्र पार्टीका सभापतिसमेत रहेका उपप्रधान एवं गृहमन्त्री रवि लामिछानेको संलग्नता रहेको भन्दै संसदीय छानविन समिति माग गरेको छ । कांग्रेसले अघि सारेको मागका कारण संसद् अवरोध जारी छ । संसद्को गतिरोध अन्त्यका लागि प्रधानमन्त्री प्रचण्ड र प्रमुख प्रतिपक्षी दलहरु निरन्तर संवादमा रहेपछि छलफल निश्कर्षविहीन हुँदैआएको छ ।
