काठमाडौं, ७ जेठ । नेकपा (माओवादी केन्द्र) का नेता रामनारायण बिडारीले उपप्रधान एवं गृहमन्त्री रवि लामिछानेलाई नेकपा (एमाले) र नेकपा (माओवादी केन्द्र) ले संरक्षण गरेको बताएका छन् । प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले माओवादी र एमालेले नै रवि लामिछानेलाई अहिलेको हैसियत प्रदान गरेको बताएका हुन् । माओवादी र एमालेले संरक्षण नगरेको खण्डमा लामिछानेको हैसियत अहिलेको जस्तो नहुने उनको दाबी छ ।
उनले लामिछानेको दल ‘टुप्पाबाट पलाएको’ टिप्पणी गरे । यस्तो दलले धेरै रापताप सहन नसक्ने उनको भनाइ छ । साथै, लामिछाने आफैं पनि राजनीतिमा कच्चा रहेकाले धेरै विवाद आएको उनको दाबी छ । राजनीतिमा लामिछानेको कुनै त्याग, बलिदान र योगदान नरहेको उनको भनाइ छ । नेता बिडारीले देशमा युद्ध र आन्दोलन रहेको बेला लामिछाने विदेशतिर भासिएको भन्दै कटाक्ष गरे ।
उपप्रधान एवं गृहमन्त्री लामिछानेले पटक–पटक आफूहरु एक थोपा पनि रगत नबगाई राजनीतिमा स्थापित भएको भनेर अभिव्यक्ति दिँदै आएकोप्रति खण्डन गर्दै उनले भने, ‘रक्तपात नगरी आयौं भनेर गृहमन्त्रीले भनेको प्रश्न गर्नुभयो । त्यसै भएर नै उहाँ कच्चा हुनुभएको हो । धेरै विवादहरु भएको हो । त्यसै भएर नै उहाँको राजनीति ओलीजीले अथवा हाम्रो पार्टीले उहाँलाई छेकथुन अथवा संरक्षण नगर्ने हो भने उहाँको हैसियत त्यस्तो हुँदैन । उहाँको पार्टी वर्खामा च्याउ उम्रेको जसरी आएको हो । हिउँद लागेपछि खाङ्ग्राङखुङ्ग्रुङ जान्छ । उहाँले धेरै फूर्ति गर्नुहुँदैन । उहाँको राजनीतिमा त्याग पनि छैन, बलिदान पनि छैन । राजनीतिक पुष्ठभूमि पनि छैन । उहाँ युद्ध, आन्दोलन भएको बेलामा विदेशमा हुनुहुन्थ्यो । यो देशमै हुनुहुन्नथ्यो । हामीले बुझ्नुपर्यो कुरा के भने उहाँ सजिलो तरिकाले आएको हुनाले अनुभव, अनुभूति र साक्षात्कार छैन । त्यसो भएर उहाँ हाम्रो उखान छ नि टुप्पाबाट पलाएको ।’
