काठमाडौं, २३ जेठ । नेकपा (एमाले) का अध्यक्ष एवं पूर्व प्रधानमन्त्री केपी शर्मा ओली विश्व वातावरण दिवसको अवसरमा बृहत अरनिको राजमार्ग सफाई अभियानमा सहभागी भएका छन् । आज (बुधबार) विश्व वातावरण दिवसको अवसरमा कौसलटारदेखि सूर्यविनायकसम्म अरनिको राजमार्ग सरसफाइ अभियान चलाइएको थियो ।
एमाले अध्यक्ष ओली सहभागी भएको उक्त कार्यक्रममा राधिका शाक्य पनि सहभागी थिईन् । ‘आज राधिका र म अरनिको राजमार्गको सडक सरसफाइमा,’– ओलीले सामाजिक सञ्जालमार्फत जानकारी गराएका छन् ।
सन् १९७३ देखि विश्व वातावरण दिवसलाई अन्तर्राष्ट्रिय दिनका रूपमा मनाउन थालिएको हो । हरेक वर्ष जुन ५ मा विश्व वातावरण दिवस मनाउने गरिएको छ । यसवर्ष ‘हाम्रो भूमि, हाम्रो भविष्य’ भन्ने नारा तय गरिएको छ । हाम्रो भूमि अर्थात् पृथ्वीलाई स्वच्छ राख्दा नै सबैको भविष्य सुरक्षित हुन्छ भन्ने सन्देश दिवसको नाराले दिन खोजेको छ ।
