काठमाडौं, २९ जेठ । आर्या इन्टरटेन्मेन्टले ‘जुनियर सिङ्गिङ स्टार’ रियालिटी सो आयोजना गरेको छ । आज (मंगलबार) रिपोर्टर्स क्लब नेपालमा पत्रकार सम्मेलनमार्फत उक्त कार्यक्रमको जानकारी गराइएको हो । आर्या इन्टरटेन्मेन्टका अध्यक्ष एवं जुनियर सिङ्गिङ स्टार कार्यक्रमका निर्देशक कपिल कार्कीले ‘नयाँ आवाजको खोजी’ नारा दिएर १६ वर्षभन्दा कम उमेरका प्रतिभाहरुका लागि रियालिटी सो आयोजना गरिएको बताए ।
‘यो कार्यक्रम नेपालको मौलिकता बोकेको कार्यक्रम हो । यो कुनै फ्रेन्चाइज कार्यक्रम होईन । ‘नयाँ आवाजको खोजी’ भन्ने नारासहित जुनियर सिङ्गिङ स्टार कार्यक्रम गर्दैछौं,’– उनले भने ।
उनले उक्त रियालिटी सो कार्यक्रममा ७५ वटै जिल्लाका प्रतिभाहरुलाई सहभागी गराइने बताए । देशभरका विभिन्न ठाउँमा फिजिकल अडिसन र फिजिकल अडिसन सम्भव नभएको ठाउँमा अनलाइन अडिसनमार्फत प्रतिभा छनोट गरिने उनको भनाइ छ ।
‘गायन क्षेत्रमा लाग्न चाहने १६ वर्षमुनिका बालबालिका, उहाँहरु जो संगीत क्षेत्रमा आफ्नो भविष्य खोज्दै हुनुहुन्छ भने उहाँहरुको लागि राम्रो प्लेटफर्म हामी दिनसक्छौं,’– उनले भने ।
निर्देशक कार्कीका अनुसार देशका विभिन्न ठाउँबाट १०० जनाभन्दा बढी बालबालिकालाई कार्यक्रममा सहभागी गराइने छ । टप २५ सम्मका प्रतिस्पर्धी छनोटमा सबै भूमिका जर्जको नै रहने छ ।
निर्देशक कार्कीले टप २५ बाट टप १० सम्म आउँदा ५० प्रतिशत जर्जको भूमिका र ५० प्रतिशत भोटको भूमिका रहने बताए । त्यसैगरी, जुनियर सिङ्गिङ स्टारमा पहिलो हुनेलाई पाँच लाख, दोस्रो हुनेलाई साढे दुई लाख र तेस्रो हुनेलाई एक लाख उपहार प्रदान गरिने बताइएको छ ।
गायक डिजराज पौडेल, प्रकाश तिमल्सिना र गायिका सरु गौतम जुनियर सिङ्गिङ स्टारको जर्ज रहेका छन् । उक्त रियालिटी सो ग्लोबल टीभी एचडीबाट हरेक हप्ताको शुक्रबार र शनिबार प्रशारण हुनेछ । जुनियर सिङ्गिङ स्टारको भोटिङ पाट्नर इसेवा रहेको छ ।
जुनियर सिङ्गिङ स्टारका जर्ज पौडेलले क्षमतो पहिचानका लागि कार्यक्रम कोशेढुङ्गा सावित हुने बताए । जर्ज गर्दाखेरी स्पष्ट रुपमा जो ट्यालेन्ट छ उसलाई छनोट गर्ने उनले बताए ।
