काठमाडौं,३१ जेठ । नेकपा एमाले काभ्रेको अध्यक्षमा राजन भुर्तेल निर्वाचित भएका छन् । बुधबार राति घोषित चुनावी नतिजाअनुसार चन्द्र लामालाई ८१ मतान्तरले पराजित गर्दै अध्यक्षमा भुर्तेल विजयी भएका हुन् । भुर्तेलले ३८० मत पाउँदा लामाले २९९ मत प्राप्त गरे ।
अध्यक्षसहित पदाधिकारीमा पनि उनको प्यानल नै विजयी भएको छ । उनी एमाले नेता तथा सांसद गोकुल बास्कोटा निकटका हुन् ।
उपाध्यक्षमा भुर्तेल प्यानलका देवसागर लामा विजयी भए । उनले ४७१ मत ल्याए । पराजित आत्मराज थापाको २०८ मत मात्रै आयो ।
सचिवमा राजकुमार सापकोटा विजयी भएका छन् । उनले ४४४ मत प्राप्त गरे । पराजित भएका होमप्रसाद चौलागाईंको २३५ मत आयो ।
उप सचिवमा रत्नकुश रन्जितकार र सूर्यमाया दनुवार निर्वाचित भए । रन्जितकारले ३२४ र दनुवारले ३६१ मत प्राप्त गरिन् ।
अध्यक्षमा पराजित चन्द्र लामा गत प्रदेश सभा निर्वाचनमा काभ्रेबाटै ३ मतले हारेका थिए । उनलाई कांग्रेसका तीर्थ लामाले ३ मतको अन्तरले पराजित गरेका हुन् । प्रदेश सभामा ३ मतले गत वर्ष हारेका उनले यसपटक पुनः फराकिलो हार व्यहोरेका छन् ।
