काठमाडौं । नेपाली कांग्रेसका सांसद प्रदीप पौडेलले सरकार र मन्त्रीबीच काम गराईमा तादम्यता नमिलेको दाबी गरेका छन् । सोमबार बसेको प्रतिनिधि सभा बैठकको शून्य समयमा बोल्दै सांसद पौडेलले प्रधानमन्त्रीलाई मन्त्रीले नर्टेने भनेर सदनमा गरेको तर्कप्रति संकेत गर्दै देश कहाँबाट चलेको छ भन्दै प्रशन गरे ।
उनले भने,‘सरकारले संसदलाई हेपेको छ, प्रधानमन्त्री भन्नुहुन्छ मेरो निर्देशन कसैले मान्दैन। प्रधानमन्त्रीय पद्धतिमा यो भन्दा लज्जाजनक कुरा के हुन्छ ? यो अराजकता कहिले अन्त्य हुन्छ ? यो देश सरकारले चलाएको छ कि अन्त कतैबाट म जवाफ चाहुन्छ ?’
सांसद पौडेलले सदनमा उपप्रधान तथा गृहमन्त्री रवि लामिछाने र रक्षामन्त्री हरि उप्रेतीको अभिव्यक्तिमाथि आपत्ति जनाएका छन् । उनले भने,‘सदनमा केही समयअघि गृहमन्त्रीले यही सदनमा विदेशीलाई सूचना बेच्ने मान्छे छ भन्नुभयो। हिजो रक्षामन्त्रीले प्रश्नको उत्तर दिने क्रममा जे अभिव्यक्ति दिनुभयो त्यो उहाँको पदीय मर्यादाभित्र पर्छ भन्ने मलाई लाग्दैन। बजेट आयो सबै मन्त्रीहरूले आफ्नो हात जगन्नाथ भनेजस्तै आफ्नै निर्वाचन क्षेत्रमा मात्रै लानुभयो।’
