काठमाडौं,१८ असार । एमालेले धोका दिएर सत्ता सहकार्य टुटाउन लागेपछि प्रधानमन्त्री पुष्पकमल दाहाल प्रचण्डले नेपाली कांग्रेसका सभापति शेरबहादुर देउवासँग टेलिफोन गरेका छन् ।
बालुवाटार स्रोतका अनुसार प्रचण्डले मंगलबार बिहान देउवालाई फोन गरेका हुन् । उनले देउवालाई भेटौं भन्ने प्रस्ताव गरेका थिए । तर, जवाफमा देउवाले भेट्ने कुरा असम्भव रहेको बताएका छन् ।
देउवाले सोमबार एमालेसँग नयाँ सरकार बनाउनेबारेमा सहमति भएको पनि जानकारी गराएका छन् । ‘मैले ढाँट्न जान्दिनँ। एमाले र कांग्रेस मिलेर सरकार बनाउने कुरा भएको छ, । अब तपाईंसँग छलफल गर्ने विषय छैन’ प्रचण्डलाई देउवाले भनेका थिए ।
सरकार सञ्चालनका लागि २ प्रमुख दल नेपाली कांग्रेस र नेकपा एमालेले गएराति सम्झदारी भएको छ । उनीहरुले २ दलको नेतृत्वमा राष्ट्रिय सहमतिका आधारमा सरकार बनाउने बताउँदै आएका छन् ।
