काठमाडौं । सहकारी विभागले एउटै व्यक्ति दुई वा दुईभन्दा बढी सहकारी संघ-संस्थाको सञ्चालक हुन नपाउने व्यवस्थाले सहकारी अभियानमा समस्या हुने भन्दै राष्ट्रिय सहकारी महासंघले आपत्ति जनाएको छ ।
सहकारी विभागले १९ जेठमा एक सूचना जारी गर्दै एउटै व्यक्ति दुई वा दुईभन्दा बढी सहकारी संघरसंस्थाको सञ्चालक भएमा त्यस्तो व्यक्तिले ३० दिनभित्र दोहोरो पद त्यागेर एकल पदमा मात्रै बस्न निर्देशन दिएको थियो । विभागको उक्त निर्देशन कार्यान्वन गर्न नसकिने महासंघको भनाइ छ ।
मंगलबार राष्ट्रिय सहकारी महासंघकी अध्यक्ष अोमदेवी मल्लले एक विज्ञप्ति जारी गर्दै विभागको सो निर्देशन कार्यान्वयन गर्न नसकिने प्रष्ट पारेकी छन् । विभागको उक्त निर्देशनले सहकारी अभियानलाई नै समस्या हुने भन्दै राष्ट्रिय सहकारी महासंघले प्रारम्भिक संस्थामा मात्रै उक्त व्यवस्था गरी संघमा सञ्चालक हुने पाउने व्यवस्था गर्नुपर्ने माग गरेको हो ।
एक जना व्यक्ति एकै समयमा एउटा मात्र सहकारी संघ/संस्थाको सञ्चालक हुन सक्ने भन्ने निर्देशनले सहकारी अभियानमा कठिनाइ उत्पन्न भएको महासंघको ठम्याइ छ ।
हालको विषम परिस्थितिमा विभागको निर्देशनले प्रारम्भिक संस्था तथा संघहरूमा बीचैमा नेतृत्व छोड्दा अन्योल सिर्जना भई समस्या आउन सक्ने महासंघको भनाइ छ ।
महासंघले विभागको सो निर्देशन अनुसार सम्बन्धित व्यक्तिहरूले ३० दिनभित्र एउटै संघरसंस्थाको मात्र संचालक पद कायम राखी अन्यको हकमा त्याग गर्नुपर्ने, अन्यथा कानुन बमोजिम कारबाहीको प्रक्रिया अगाडि बढाउने भन्ने निर्देशित गरिएको र हालको विषम परिस्थितिमा यो निर्देशनले प्रारम्भिक संस्था तथा संघहरूमा बीचमै नेतृत्व छोड्दा अन्यौलता सिर्जना भई समस्या आउन सक्ने भएकाले सम्पूर्णमा विचलन नभई पुर्ववत अवस्थामा काम गर्न समेत राष्ट्रिय सहकारी महासंघले आह्वान गरेको छ ।
