काठमाडौं, २ साउन । नेकपा (माओवादी केन्द्र) का नेता तथा सांसद महेन्द्रबहादुर शाहीले नेपाली जनताको सङ्घर्षबाट प्राप्त उपलब्धिको रक्षा गर्नु प्रमुख जिम्मेवारी भएको बताएका छन् ।
वीरेन्द्रनगर सुर्खेतमा आयोजित एक कार्यक्रमका अवसरमा सांसद शाहीले जनताको त्याग, सङ्घर्ष र बलिदानबाट प्राप्त उपलब्धि रक्षा गर्न चुनौती बढ्दै गएको बताएका हुन् ।
कर्णाली प्रदेशका प्रथम मुख्यमन्त्रीसमेत रहेका शाहीले समाजमा रहेका थुप्रै विभेदको अन्त्य गर्न र सबै वर्ग, जाति, लिङ्ग, धर्म मान्नेको अधिकार स्थापनाका लागि मुलुक एकात्मकबाट सङ्घात्मक राज्यमा गएको बताए ।
एकात्मक राज्यबाट न्यायोचित विकास हुन नसकेका कारण सङ्घीय संरचनामा जानु परेको तर्क गर्दै नेता शाहीले भने, “अहिलेको मूल जिम्मेवारी भनेकै सुशासन कायम, पूर्वाधार विकास र आर्थिक समृद्धि हो । अस्थिरताको अन्त्यगरी नेपाली जनतालाई दुःखबाट मुक्त एवं दोहन भइरहेको राज्यको स्रोत शक्ति जगेर्ना गर्नु हो ।”
उनले वीरेन्द्रनगर नगरपालिकाको १४ नम्बर वडास्थित सुतखोलामा ड्याम बनाएर वीरेन्द्रनगरवासीलाई पानी आपूर्ति गरे दीगो व्यवस्थापन हुनुका साथै कृत्रिम ताल निर्माणले पर्यटक भित्रिने र आर्थिक आम्दानी बढ्ने बताए । File Photo
