काठमाडौं, १९ साउन । रिपोर्टर्स क्लब नेपालका सभापति एवं प्राइम टाइम्स टेलिभिजनका अध्यक्ष ऋषि धमलाले जलवायु परिवर्तनको संकट सामना गर्न सबैले आ–आफ्नो ठाउँबाट बृक्षरोपणको थालनी गर्नुपर्ने बताएका छन् ।
आज (शनिबार) लायन्स क्लब अन्तर्राष्ट्रिय लियो जिल्ला परिषद् ३२५एल नेपालले बालाजु पार्कमा आयोजना गरेको बृक्षरोपण कार्यक्रममा सहभागी पत्रकार धमलाले हिमाल, पहाड, तराई मिलेर बनेको सुन्दर देशमा जलवायु परिवर्तनका असरहरु देखिन थालेको बताए । उनले जलवायु परिवर्तनको असर कम गर्न बृक्षरोपण आवश्यक रहेको बताए ।
‘देश जलवायु परिवर्तनका कारणले संकटमा छ । सबैले आ–आफ्नो ठाउँबाट बृक्षरोपण गरौं । हिमाल, पहाड, तराई मिलेर बनेको देशमा आज जलवायु परिवर्तनको असर देखा परिरहेको छ,’– उनले भने ।
साथै, पत्रकार धमलाले उत्पादनमुखी कार्यमा लागेर नेपाललाई आत्मनिर्भर बनाउनुपर्ने बताए । उनले युवाहरुको उत्पादनमा लाग्ने अभियानमा आफूले हरतवरबाट सहयोग गर्ने पनि बताए ।
