काठमाडौँ । काठमाडौँ महानगरपालिकाका उपप्रमुख सुनिता डंगोल संयुक्त राष्ट्र संघको ७९ औ महासभामा भाग लिन अमेरिका प्रस्थान गरेकी छन् ।
डंगोललाई महानगरपालिकाका प्रमुख प्रशासकीय अधिकृत प्रदीप परियारले त्रिभुवन अन्तरराष्ट्रिय विमानस्थलको विशिष्ट कक्षबाट विदाइ गरेका छन् । विदाइका लागि प्रशासन विभागका प्रमुख नमराज ढकाल, सभा गृहका प्रमुख सुदर्शन भट्टराई, सचिवालय प्रमुख सौरभ गौत्तमसहित अधिकारीहरु पुगेका थिए ।
उपप्रमुख डंगोलसँगै मनोनयनमा परेका डडेलधुराको परशुराम नगरपालिकाका प्रमुख भरत जोशी, र नेकपा एमालेका युवा नेता अब्दुस मियाँ पनि महासभाका लागि प्रस्थान गरेका छन् ।
भाद्र २७ गते महासभाको औपचारिक उद्घाटन भइसकेको छ । ‘कसैलाई पनि पछाडि नछाडौँ, वर्तमान र भावी पुस्ताका लागि शान्ति, दिगो विकास र मानव निष्ठा सुनिश्चित गर्न सहकार्य गरौँ’ भन्ने नाराका साथ महासभा सुरु भएको हो ।
महासभा वैठकअन्तर्गतको समिट अफ द फ्युचरमा सहभागी हुन उनीहरुलाई काठमाडौँस्थित युएनको प्रतिनिधि कार्यालय र नेपाल सरकारले, युवा नेतृत्व प्रतिनिधिका रुपमा मनोनयन गरेको हो । महासभाको कार्यक्रम तालिकाअनुसार असोज ६ र ७ गतेका कार्यक्रममा उपप्रमुख डंगोल सहभागी हुनुछिन् । उपप्रमुखको सचिवालय प्रमुख गौत्तमका अनुसार समिटका अतिरिक्त संयुक्त राष्ट्र संघका साइड एजेन्सीले आयोजना गर्ने अन्य कार्यक्रममा उपप्रमुख डंगोलले सहभागिता जनाउनेछिन् ।
औपचारिक कार्यक्रम सुरु भए पनि उच्चस्तरीय छलफल भने असोज ८ गते देखि सुरु हुनेछ । यो छलफल असोज १२ गतेसम्म चल्नेछ । महासभाको समापन असोज १४ मा हुने कार्यतालिका छ । नेपालको प्रतिनिधित्व गर्दै प्रधानमन्त्री केपी शर्मा ओलीले असोज १० गते महासभामा सम्वोधन गर्ने कार्यक्रम तय भएको छ ।
विश्वव्यापी रुपमा देखा परेको युद्धको जटिल अवस्था र यसले पारेको असर, कोरोना पश्चातको मुल्यवृद्धि र गरिबी, जलवायु परिवर्तन र दिगो विकासका लक्ष्य, मानव स्वास्थ्यको प्रतिकुलता, खाद्य संकटलगायत विषय महासभामा समेटिएका छन् । यी विषयलाई केन्द्रमा राखेर सञ्चालन हुने विभिन्न चरणमा कार्यक्रममा विश्वका राष्ट्र प्रमुख तथा सरकार प्रमुखले भाग लिनेछन् ।
