काठमाडौं । आज दिउँसो ४ बजे हुने भनिएको राष्ट्रिय स्वतन्त्र पार्टीको पत्रकार सम्मेलन स्थगित भएको छ । उक्त पत्रकार सम्मेलन अब आइतबार दिउँसो साढे २ बजे हुनेछ । पत्रकार सम्मेलन स्थगित गरेर रास्वपाले आइतबारका लागि केन्द्रीय समितिको बैठक डाकेको छ ।
पार्टी केन्द्रीय कार्यालय, बनस्थलीमा बस्ने बैठकका छलफलका लागि ६ एजेण्डा रहेको रास्वपाले जनाएको छ । छलफलका एजेण्डामा समसामयिक राजनीतिक गतिविधि, चिन भ्रमण र पार्टी गतिविधि रिपोर्टिङ, प्रथम राष्ट्रिय भेलाको समीक्षा, स्थानीय तह उपनिर्वाचन, महाधिवेशन केन्द्रीत गतिविधि र विविधि राखिएको छ ।
रास्वपाका सभापति रवि लामिछाने सहकारी ठगीमा मुछिएपछि रास्वपा सरकारविरुद्ध आक्रामक रुपमा उत्रने तयारी गरेको छ । सहकारी छानबिन समितिले रविलाई कारबाहीका लागि सिफारिस गरेपछि गत साता उनलाई पक्राउ गर्ने तयारी भएको थियो । तर,रास्वपाले प्रतिवाद गर्ने चेतावनीपछि सरकार ब्याक हटेको छ । सोही प्रकरणमा रविका पूर्व व्यापारिक साझेदार रहेका पूर्व डीआईजी छविलाल जोशी भने ६ दिनदेखि कास्की प्रहरीको हिरासतमा छन् ।
