काठमाडौं, १३ असोज ।, बागमती प्रदेशका अर्थमन्त्री कुन्दनराज काफ्लेले बाढी, पहिरोलगायतका विपद्मा प्रदेश सरकारले प्रभावकारी ढंगले काम गर्न नसकेको टिप्पणी गरेका छन् । आज (आइतबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले विपद्को समयमा प्रदेश सरकार हेरेर नबसेपनि प्रभावकारी काम भने गर्न नसकेको बताएका हुन् ।
‘हामी मन्त्रीहरु नै सडकमा थियौं । यो विपद्को कारणले हामीले जुन हिसाबले सञ्चालन गर्नुपर्ने हो, प्राकृतिक विपद्को कारणले नसकिएको हो । बागमती प्रदेश सरकार हेरेर बसेको छैन । सुरुदेखि नै बाढी पहिरो गएको ठाउँमा, पुरिएको ठाउँमा बागमती सरकार अनुभूति गर्ने गरी अगाडि बढेको छ । तर, प्रभावकारी ढंगले काम गर्न सकिएन,’– उनले भने ।
प्रदेश सरकारको तर्फबाट आफूहरुले रात दिन नभनी काम गरिरहेको बताउँदै उनले जुन स्पिरिटमा अगाडि बढ्नुपर्ने हो, त्यो चाहीँ हुन नसकेको स्वीकार गरे । उनले स्रोत, साधन र भूगोलका कारणले पनि उद्धारमा ढिलाइ हुन गएको बताए ।
