काठमाडौं, २४ कार्तिक । ट्राभल र टुर व्यवसायीहरूको छाता संस्था नाटा (नेपाल एशोसिएसन अफ टुर एण्ड ट्राभल एजेन्ट्स) नाटाकी केन्द्रीय महासचिव युविका भण्डारीले आफूहरु कहिले पनि कमिसनको खेलमा नरहेको बताएकी छन् । आज (शनिबार) रिपोर्टर्स क्लब नेपालले आयोजना गरेको साक्षत्कार कार्यक्रमलाई सम्बोधन गर्दै उनले एयरलाईन्सहरुले ट्राभल एजेन्सीलाई कुनै पनि कमिसन नदिने र हवाइ भाडा बढ्नुमा आफूहरुको संलग्नता नरहेको बताएकी हुन् ।
‘हामी ट्राभल एजेन्सीहरुको काम एयरलाइन्सको टिकट उपभोक्तालाई पठाउने हो । नेपाल चाहीँ एक्लो एउटा देश होला जहाँ ट्राभल एजेन्सीले टिकट बेच्दाखेरी शून्य कमिसन पाउँछ । अरु देशहरुमा ९ प्रतिशत, ७ प्रतिशत छ भने नेपालको सन्दर्भमा ट्राभल एजेन्सीलाई कुनै पनि एयरलाईन्सले कमिशन दिँदैन । ट्राभल एजेन्सी कमिशनको खेलमा कहिले पनि छैन,’– उनले भनिन् ।
उनले पोखरा र भैरहवाको अन्तर्राष्ट्रिय विमानस्थलहरु सञ्चालनमा आउन नसक्दा पनि अहिले भाडा महँगो बनेको बताईन् । नाटाले यसअघि नै अहिलेको अवस्था आउनसक्छ भनेर खबरदारी गरेपनि सरकारले नसुनेको गुनासो गरिन् । ‘यस्तो महँगो हुन्छ है भनेर नाटाले खबरदारी चाहीँ गर्दै आएको हो । हामीले क्यान र पर्यटन मन्त्रालयलाई पनि खबरदारी गर्दै आइरहेका थियौं । यो हामीले भन्दाखेरी पनि यसको सुनुवाई भएन,’– उनले भनिन् ।
नाटाकी महासचिव भण्डारीका अन्ुसार पहिले डेढ लाखमा पाइने हवाइ टिकटको मूल्य अहिले ३ लाखसम्म भएको छ । भारतको नयाँ दिल्लीको एकतर्फी टिकट ७२ हजार रहेको छ । ‘पहिले डेढ लाखमा पाउने टिकट ३ लाख भएको छ । दिल्लीको वान वे टिकट पहिला ८ हजारसम्म पनि आउने थियो । अहिले ७२ हजारसम्म पुगेको छ । यसले हाम्रो पर्यटनलाई नै नकारात्मक प्रभाव पारेको छ । टिकटको मूल्य बढ्यो भने ट्राभल एजेन्सीहरु कहिले पनि खुसी हुँदैन,’– उनले भनिन् ।
उनले देशले अर्थतन्त्रको तेस्रो खम्बाको रुपमा रहेको पर्यटनको बारेमा कहिले पनि सोच्न नसकेको उनको टिप्पणी छ । उनले सरकारले चाहेको खण्डमा हवाइ टिकटको मूल्य घटाउन सकिने बताईन् । अहिलेको हवाई भाडा सान्दर्भिक नरहेको उनको टिप्पणी छ । महासचिव भण्डारीले क्यान, पर्यटन विभाग, पर्यटन मन्त्रालयलायतका निकायले हवाइ भाडाबारे नियमन र नियन्त्रण गर्नुपर्ने बताईन् । ‘सरकारले मूल्यलाई घटाउन सक्छ । किनभने एक घण्टाको फ्लाइटलाई २७ हजार लिनुभनेको अलिकति पनि लजिकल देखिँदैन,’– उनले भनिन् ।
हिजोदेखि त्रिभुवन अन्तर्राष्ट्रिय विमानस्थलको स्तरोन्नति सुरु भएको छ । स्तरोन्नतिको कामसँगै हवाइ उडान ३५ प्रतिशतले कटौति हुँदा अन्तर्राष्ट्रिय हवाइ उड्ययन कम्पनीहरुले अचाक्ली भाडा बढाएका छन् । दैनिक १० घण्टासम्म उडान कटौति हुने बताइएको छ ।
