काठमाडौं । काठमाडौंमा जारी नेपाल प्रिमियर लिग (एनपीएल) मा सुदूरपश्चिम रोयल्सका कप्तान दीपेन्द्रसिंह ऐरी सबैभन्दा छिटो अर्धशतक पूरा गर्ने खेलाडी बनेका छन् ।
मंगलबार त्रिवि क्रिकेट मैदान कीर्तिपुरमा विराटनगरविरुद्धको खेलमा ऐरीले २३ बलमै अर्धशतक पूरा गरेका हुन् । उनी २४ बलमा ५७ रन जोडेर नटआउट रहे । ऐरीको आक्रामक ब्याटिङमा सुदूरपश्चिम विराटनगरसामु १ सय ८३ रनको चुनौती खडा गर्न सफल रह्यो ।
दीपेन्द्रसिंह ऐरी विश्व क्रिकेटको इतिहासमा सर्वाधिक ९ बलमा अर्धसतक बनाउने खेलाडी पनि हुन् । उनले नेपालबाट ५५ ओडीआई र ६७ टीट्वेन्टी खेलेका छन् । २४ वर्षे दीपेन्द्र अलराउण्डतर्फ विश्व क्रिकेट वरियतामा दोस्रो स्थानमा छन् ।
जारी एनपीएलमा जनकपुर बोल्ट्सका कप्तान अनिलकुमार साह अर्धशतक पूरा गर्ने पहिलो खेलाडी बनेका थिए । उनले ३५ बलमा ५२ रन जोडेका थिए । अनिलको रेकर्ड दोस्रो दिनमै दीपेन्द्रले तोडेका छन् ।
