काठमाडौं । कप्तान दीपेन्द्रसिंह ऐरीको अर्धशतकप्रेरित सुदूरपश्चिम रोयल्सले नेपाल प्रिमियर लिगमा विजयी सुरुआत गरेको छ । टीयु क्रिकेट मैदानमा सुदूरपश्चिमले दिएको १८३ रनको लक्ष्य पछ्याएको विराटनगर किंग्स १६ ओभर एक बलमा ९२ रनमा समेटिएपछि सुदूरले ९० रनको जित निकाल्दै विजयी सुरुआत गरेको हो ।
विराटनगरका बसिर अहमदले २४, निकोलस किर्टोनले १५ र क्रिस सोलेले १० रन बनाए । अरुले दोहोरो अंकमा रन जोड्न सकेनन् । यो विराटनगरको लगातार दोस्रो हार हो । यसअघि जनकपुर बोल्टसँग ८ विकेटले पराजित भएको थियो ।
सुदूरपश्चिमले बलिङमा पनि उत्कृष्ट प्रदर्शन गर्दा विराटनगर निरिह बन्यो । विराटनगरविरुद्ध फराकिलो जीत निकाल्ने क्रममा अविनाश बोहोरा र स्कटले तीन/तीन विकेट लिए । ब्रान्डन, इशान पाण्डे र सैफ जैबले एक/एक विकेट लिए ।
यसअघि कीर्तिपुर मैदानमा सुदूरपश्चिमले कप्तान दीपेन्द्रसिंह ऐरीको आक्रामक अर्धशतकको मद्दतमा सुदूरपश्चिमले निर्धारित २० ओभरमा ६ विकेट गुमाएर १८२ रनको विशाल स्कोर खडा गर्यो । सुदूरका लागि कप्तान दीपेन्द्रसिंह ऐरीले शानदार ब्याटिङ गरे । २४ बलको सामना गरेका दीपेन्द्रले ५ छक्का र ३ चौकाको मद्दतमा ५७ रनको अर्धशतकीय पारि खेले ।
ब्रान्डन म्याकमुलेनले ३६ रन बनाएको खेलमा विनोद भण्डारीले २३, इशान पाण्डेले २१, सैफ अली जैबले १४ तथा स्कट कुगेलेइनले १० रन थपे । बलिङतर्फ अनिल खरेलले सर्वाधिक तीन विकेट लिँदा इस्मत आलम, क्रिस सोल र बसिर अहमदले समान १ विकेट लिए ।
