काठमाडौं । नेपाल प्रिमियर लिग (एनपीएल) मा सुदूरपश्चिम रोयल्सले जनकपुर बोल्ट्सलाई १२४ रनको सामान्य लक्ष्य दिएको छ ।
त्रिवि मैदानमा टस जितेर पहिले ब्याटिङ गरेको सुदूरपश्चिम रोयल्सले निर्धारित २० ओभरमा ९ विकेट गुमाएर १२३ रनमात्र जोड्न सक्यो । सुदूरपश्चिमका लागि विनोद भण्डारीले सर्वाधिक ३३ रन जोडे । सैफ अली जैबले २१ रन जोडेको खेलमा इशान पाण्डेले १७ रन थपे । तीन बलको सामना गरेका कप्तान दीपेन्द्रसिंह ऐरीआज पनि शून्य रनमै आउट भए । ब्रान्डन म्याकमुलेन ११ तथा स्कट कुगेलेइन ७ रनमा आउट भए ।
बलिङतर्फ जनकपुरका किशोर महतोले ४ विकेट लिए । ४ ओभरमा ३५ रन खर्चिएका महताले चार विकेट लिएपछि सुदर कमजोर स्कोरमा रोकिएको थियो । शेर मल्ल र अरनिको यादवले २ तथा हर्ष ठाकरको नाममा एक विकेट रह्यो । जनकपुर अपराजित टोली हो भने सुदूरपश्चिमले एक खेल गुमाएको छ ।
जनकपुर यो खेलमा जित निकालेमा २ खेल अगावै प्लेअफमा आफ्नो स्थान सुरक्षित बनाउनेछ । जनकपुर ४ खेलमा ४ जितसहित पहिलो र सुदूरपश्चिम ३ जितसहित दोस्रो स्थानमा छन् ।
