काठमाडौं । नेपाल प्रिमियर लिग (एनपिएल) मा इलिमिनेटरअन्तर्गतको खेलमा कर्णाली याक्सले चितवन राइनोजलाई १७६ रनको चुनौती पेश गरेको छ ।
त्रिवि क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ६ विकेट गुमाएर १७५ रन जोड्यो ।
कर्णालीका लागि विलियम बोसिस्टो र जयकिशन कोल्सावालाले अर्धशतक बनाए । ३९ बलमा ६ चौका र २ छक्का हिर्काएका जयकिशन ५३ रनमा आउट हुँदा ३९ बलमै ३ चौका र २ छक्का हिर्काएका बोसिस्टो ५२ रनमा आउट भए । चाडविक वाल्टन ४६ रनमा नटआउट रहे । जिसन मक्सुदले १४ रन थपे ।
बलिङमा चितवनका सोहित तानभिरले २ तथा कुशल मल्ल, शरद भेषवाकर र रवि बोपाराले समान १ विकेट लिए । यो खेलको विजेताले क्वालिफायर १ को पराजित टोलीसँग क्वालिफायर २ खेल्नेछ । उक्त खेलको विजेता टोली प्रतियोगिताको फाइनलमा पुग्नेछ । यता इलिमनेटरमा पराजित टोलीको भने एनपीएलको यो सिजनको यात्रा समाप्त हुनेछ । त्यसैले चितवन र कर्णालीबीचको आजको खेललई ‘डु अर डाई’ को रूपमा हेरिएको छ ।
