काठमाडौं, ५ पुस । नेकपा (एमाले) का उपमहासचिव विष्णु रिमालले पूर्व प्रधानमन्त्री पुष्पकमल दाहाल ‘प्रचण्ड’ ले आफूलाई भ्रष्टाचारविरोधी महानायक भन्दाखेरी जनता हाँसेको टिप्पणी गरेका छन् । हिजो (बिहीबार) प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दैै उनले पूर्व प्रधानमन्त्री प्रचण्डको कुरा पत्यार नलागेर आफूहरु पनि हाँसेको बताएका हुन् ।
प्रधानमन्त्री केपी शर्मा ओलीका प्रमुख राजनीतिक सल्लाहकारसमेत रहेका रिमालले प्रचण्डले कुनै भ्रष्टाचारविरोधी काम नगरेको दाबी गरे । ‘मलाई नाम लिन मन छैन, विपक्षी दलको नेताले म चाहीँ भ्रष्टाचारविरोधी महानायक भन्दाखेरी मान्छे मरीमरी हाँसेका छन् । पत्यार लाग्दो कुरा नलागेर तपाईँ हामी हाँसेको होईन र ? नत्र प्रधानमन्त्री भएको मान्छेले बोलेको कुरामा हामी किन हाँस्थ्यौं त ? किन हाँसेको भन्दा उहाँले पत्यार नलाग्दो कुरा गर्नुभयो,’– उनले भने ।
नेकपा (माओवादी केन्द्र) का अध्यक्षसमेत रहेका प्रचण्डले आफूले भ्रष्टाचारविरोधी अभियानको नेतृत्व गर्दा भ्रष्टहरु आत्तिएर आफूलाई हटाएको दाबी गर्दै आएका छन् ।
