काठमाडौं । हालै सम्पन्न नेपाल प्रिमियर लिग (एनपीएल) को उपाधि विजेता जनकपुर बोल्ट्सले एनपीएलको ट्रफी मधेशका आठै जिल्लामा परेड गर्ने भएको छ ।
४ दिनसम्म जनकपुरले मधेशका सबै जिल्लामा ट्रफी परेड गर्ने एनपीएल विजेता जनकपुर बोल्टस्ले जनाएको छ । रामजानकी मन्दीरबाट सुरु हुने परेड सप्तरीमा गएर सकिनेछ ।
शुक्रबारदेखि सुरु हुने परेडको पहिलो दिन धनुषास्थित राम जानकी मन्दिरमा तय गरिएको छ । शनिबार मोहत्तरी, सर्लाही र रौतहटमा ट्रफी परेड गरिनेछ । तेस्रो दिन आइतबार बारा र पर्सामा परेड गरिने र अन्तिम दिन अर्थात सोमबार सिराहा र सप्तरीमा ट्रफी परेड गरिनेछ ।
गत शनिबार भएको उपाधि भिडन्तमा सुदूरपश्चिम रोयल्सलाई ५ विकेटले हराउँदै जनकपुरले पहिलो संस्करणको एनपीएल आफ्नो नाममा लेखाएको थियो ।
