काठमाडौं । नेपाल क्रिकेट संघ (क्यान) को आयोजनामा जनकपुर र पर्सामा जारी जय ट्रफी पुरुष एलिट कप क्रिकेटअन्तर्गत आजबाट दुई खेल भइराखेको छ ।
विभागी टिम आर्मीले बागमतीविरुद्ध ब्याटिङ गर्दा अर्को खेलमा नेपाल पुलिसविरुद्ध मधेश प्रदेशले ब्याटिङ गरिरहेको छ ।
वीरगञ्जमा जारी पुलिस र मधेशको खेलमा मधेशका ओपनर मयन यादवले अर्धशतक प्रहार गरेका छन् । ८२ बलमा ४ चौका र २ छक्का हिर्काउँदै मयनले अर्धशतक हिर्काएका हुन् । यसअघि मयनले बागमतीविरुद्ध शतक लगाएका थिए ।
ताजा अवस्थामा मधेशले २६ ओभरमा २ विकेट गुमाएर ९६ रन जोडेको छ । उता जनकपुरमा जारी खेलमा बागमतीविरुद्ध आर्मीले १९ ओभरमा बिना कुनै क्षति ७६ रन जोडेको छ ।
यसअघि भएका खेलमा सबै टोलीले ‘ड्र’ खेलेका थिए । ४ टोली सहभागी प्रतियोगितामा शीर्ष दुईमा रहने टोलीले फाइनल खेल्नेछन् ।
