काठमाडौं, २५ पुस । नेकपा (एमाले) का नेता ठाकुर गैरेले डा.भीम रावल एमालेमा फर्किने ढोका बन्द भएको बताएका छन् । आज (बिहीबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले पछिल्लो समय रावलको गतिविधिले उनको एमालेमा फर्किने वा कारबाही फुकुवा हुने सम्भावना सकिएको बताएका हुन् ।
साथै, रावलका पछिल्ला अभिव्यक्ति र उनको साथ, संगतले एमालेको कारबाही ठीक थियो भन्ने पुष्टि गरेको उनले बताए । ‘उहाँले अहिले जुन नममा अभियान चलाउने कुरा गर्नु भएको छ र उहाँको वरिपरी जस्ता–जस्ता मान्छेहरुको र जो–जोको संलग्नता र जो–जोले स्वागत गर्दैछन्, त्यस हिसाबले त उहाँ त अर्को बाटोमा हिँड्दै हुनुहुन्छ । उहाँको बारेमा एमालेमा अब थप चर्चा परिचर्चा गर्नुपर्ने आवस्यकता छ भन्ने लाग्दैन,’– उनले भने ।
