काठमाडौं । नेकपा एकीकृत समाजवादीका अध्यक्ष माधवकुमार नेपालले नेपाली कांग्रेसका सभापति शेरबहादुर देउवाको गृहजिल्ला डडेल्धुरामा विमानस्थल बनाउने कुराप्रति आपत्ति जनाएका छन् ।
बिहीबार बसेको प्रतिनिधि सभाको अन्तराष्ट्रिय सम्बन्ध तथा पर्यटन समितिको बैठकमा बोल्दै पूर्व प्रधानमन्त्रीसमेत रहेका नेपालले कमिसन खान पाईन्छ भनेर विमानस्थल बनाउन लागेको हो भन्दै प्रश्न गरेका हुन् ।
‘मेरो जिल्लामा पो आँखा गाड्नुभयो भन्नुहोला । त्यो चल्छ त्यहाँ विमानस्थल ? बैतडीमा चलिरहेको छ । त्यो विमानस्थल बनाउनुपर्ने किन ? उदयपुरमा के आवश्यकता छ ? किन बनाउनु पर्यो । भनेपछि त्यहाँ ठेक्का लाग्छ, ठेक्कामा कमिसन खान पाइन्छ’उनले प्रश्न गर्दै भने ।
पूर्व प्रधानमन्त्रीसमेत रहेका देउवाले आफ्नो गृह जिल्लामा एउटा विमानस्थल बनाउने धोको राखेका छन् । प्रत्येक चुनावमा भोट माग्दा देउवाले विमानस्थलको आश देखाउने गरेका छन् । यद्यपि हालसम्म डडेल्धुरामा विमानस्थल बन्न सकेको छैन् । डडेल्धुराको छिमेकी जिल्ला बैतडीमा भने विमानस्थल छ ।
