काठमाडौं । प्रधानमन्त्री कप राष्ट्रिय महिला क्रिकेटमा विभागीय टिम आर्मीलाई हराउँदै बागमती प्रदेशले पहिलो जित निकालेको छ । आज भएको पहिलो खेलमा बागमतीले आर्मीलाई १४ रनले पाखा लगायो ।
बागमतीले दिएको ८२ रनको लक्ष्य पछ्याएको आर्मी १३ ओभरमा ६७ रनमा अलआउट भयो । आर्मीका लागि अञ्जली विश्वकर्माले १४ तथा निगिमा तामाङले १३ र लक्ष्मी साउदले १० रन जोड्नि अरुले राम्रो प्रदर्शन गर्न सकेनन् । बागमतीका लागि सोनु खड्का, मनिषा उपाध्याय र कञ्चन श्रेष्ठले समान २ विकेट लिईन् ।
त्यसअघि खराब मौसमका कारण १५ ओभरमा झारिएको खेलमा टस हारेर पहिले ब्याटिङ गरेको बागमतीले निर्धारित ओभरमा २ विकेट गुमाएर ८१ रन जोड्यो ।
बागमतीका लागि यसु पाण्डेले २५, कप्तान कञ्चन श्रेष्ठले २४ तथा यसोधा विष्टले २० रन जोडिन् । १२ रन बागमतीले अतिरिक्तमा पायो । आर्मीका लागि ईश्वरी विष्ट र लक्ष्मी साउदले समान १ विकेट लिए ।
