काठमाडौं । काठमाडौंमा जारी जय नेपाल कप टी-२० क्रिकेटमा पूर्वाञ्चल विश्वविद्यालयले अर्को हार ब्यहोरेको छ । आज भएको खेलमा पूर्वाञ्चल त्रिभुवन विश्वविद्यालयसँग १६७ रनको फराकिलो अन्तरले पराजित भयो ।
त्रिवि मैदानमा त्रिविले दिएको २१२ रनको विशाल लक्ष्य पछ्याएको पूर्वाञ्चल ९ ओभरमा ४४ रनमै अलआउट भयो । पूर्वाञ्चलका लागि शत्यम मलिकले जोडेको ७ रननै सर्वाधिक रह्यो । त्रिविका लागि अमित मण्डलले ३ ओभरमा ५ रन दिएर ४ विकेट चट्काए । भीम सार्कीले दुई विकेट लिँदा मुकेश ओझा र सौगात भण्डारीले समान १ विकेट लिए ।
त्यसअघि नेपाली राष्ट्रिय टिमका खेलाडी लोकेश बमको अर्को शानदार प्रदर्शनको मद्दतमा त्रिविले पूर्वाञ्चललाई २१२ रनको विशाल लक्ष्य दिएको थियो । लोकेशले शतक प्रहार गरेका छन् । उनले ५३ बलमा १०३ रन जोड्दै शतक पूरा गरेका हुन् । निर्धारित २० ओभरमा त्रिविले २ विकेट गुमाएर २११ रन जोड् सफल भयो ।
त्रिविका लागि लोकेशले १०३ तथा आइस भट्टराईले ८८ रन जोडे । ५७ बलको सामना गरेका उनले शानदार ब्याटिङ गरे । त्यस्तै भीम सार्की १६ रनमा नटआउट रहँदा खड्क बोहरा २ रनमा आउट भए । बलिङतर्फ पूर्वाञ्चलका धीरज यादवले २ विकेट लिए ।
प्रतियोगितामा तीन देशका ८ विश्वविद्यालयका टोलीबीच प्रतिस्पर्धा हुँदैछ।
समूह ‘ए’ त्रिभुवन विश्वविद्यालय, ढाका विश्वविद्यालय, पूर्वाञ्चल विश्वविद्यालय र बाबासाहेब भीम राव अम्बेडकर विश्वविद्यालय बिहार छन्।
समूह ‘बी’ मा काठमाडौं विश्वविद्यालय, लखनऊ विश्वविद्यालय, दिल्ली विश्वविद्यालय र मध्यपश्चिम विश्वविद्यालय छन्।