काठमाडौं, १७ माघ । नेपाल कम्युनिष्ट पार्टी क्रान्तिकारी माओवादीका कार्यवाहक महासचिव सीपी गजुरेलले पुष्पकमल दाहाल ‘प्रचण्ड’ कै कारण वर्तमान सरकार नढल्ने बताएका छन् । हिजो (बुधबार) प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले प्रचण्डको गणितीय शुत्रबाट वर्तमान सरकार नढलेपनि आफूहरुले भने व्यवस्था नै ढल्ने देखिरहेको बताए ।
‘प्रचण्डको गणितीय शुत्रबाट त अहिलेसम्म सरकार ढाल्ने जस्तो देखिँदैन । हामी चाहीँ के देख्छौं भने अन्य कारणले गर्दा सरकारमात्रै होईन यो व्यवस्था नै ढल्छ भन्ने हो हाम्रो मान्यता । हामीले भनेको काम चाहीँ संसद्को गणितले गर्नेवाला छैन,’– उनले भने ।
उनले आफ्नै जीवनकालमा २/३ वटा व्यवस्था ढलिसकेको बताउँदै जनताको सडक आन्दोलनले यो व्यवस्था पनि ढल्ने बताए । ‘हामीले व्यवस्था नै ढाल्दै आएको हो । मेरो जीवन कालमा दुई/तीन वटा व्यवस्था ढलिसके । म यसमा ढुक्क छु,’– उनले भने ।File Photo/RN
