काठमाडौं । राष्ट्रिय महिला फुटबल टिमका मूख्य प्रशिक्षक राजेन्द्र तामाङले पदबाट राजीनामा दिएका छन् । बुधबार साँझ भएको साफ च्याम्पियनसिपको फाइनलमा नेपाली टिम बंगलादेशसँग पराजित भएपछि तामाङले पदबाट राजीनामा दिएको घोषणा गरेका हुन् ।
तामाङले अब आफू राष्ट्रिय टिमको प्रशिक्षकको जिम्मेवारीमा नरहने प्रष्ट पारेका छन् । उनले अब आफू क्लबतिर लाग्ने योजनामा रहेको बताएका छन् । हिजोको फाइनल खेलमा नेपाल बंगलादेशसँग २-१ ले पराजित हुँदै छैठौंपटक उपविजेतामै सीमित बनेको थियो ।
फाइनल खेलमा तामाङको भूमिकालाई लिएर व्यापक प्रश्न उठेका छन् । खासगरी बंगलादेशविरुद्ध बराबरी गोल फर्काएकी अमिषा कार्कीलाई बिना कारण मैदानबाट निकालेर अनिता बस्नेतलाई खेलाएको भन्दै दर्शकले आक्रोश पोखेका छन् । बंगलादेशले गरेको पहिलो गोललगत्तै अमिषाले बराबरी गोल फर्काएकी थिईन् । तर, लगत्तै उनलाई बाहिर पठाएर अनितालाई ल्याईएको थियो । त्यसपछि बंगलादेशले अर्को गोल गर्यो भने नेपाल पराजित भयो ।
नेपाली महिला टिमले हारेको यो १२औँ फाइनल हो । साफमा मात्रै नेपाल फाइनलमा पराजित भएको यो छैटौँपटक हो ।
