काठमाडौं, १२ मंसिर । लोकतान्त्रिक समाजवादी पार्टी (लोसपा) का नेता तथा पूर्वमन्त्री जितेन्द्र सोनालले चिनियाँ विकास परियोना बेल्ट एण्ड रोड इनिसिएटिभ्स (बीआरआई) को अनुदान लिँदा पनि सशंकित हुनुपर्ने अवस्था रहेको टिप्पणी गरेका छन् । आज (बुधबार) प्रधानमन्त्री केपी शर्मा ओलीको चीन भ्रमणको सन्दर्भमा रिपोर्टर्स क्लब नेपालले आयोजना गरेको दलका नेताहरुसँगको साक्षत्कार कार्यक्रमलाई सम्बोधन गर्दै उनले बीआरआईबाट नेपाल र नेपाली सशंकित हुनुपर्ने बताएका हुन् ।
‘चिनियाँ पक्षबाट बेलाबखत कुरा आउँछ– पोखरा एयरपोर्ट पनि बीआरआईको पार्ट हो भने आइरहेको छ । यो खतरनाक कुरा हो । यस्ता कुराबाट देश बच्नुपर्छ । बीआरआईको बारेमा श्रीलङ्कामा जसरी उसको गतिविधि हेरियो, त्यसबाट नेपाल सशंकित छ, हामी सशंकित छौं,’– उनले भने ।
उनले एउटा नागरिकको टाउकोमा ८६ हजार ऋण रहेको स्मरण गराउँदै बीआरआईअन्तर्गतको ऋण फेरि थुपार्न नहुने बताए । बीआरआई नेपालको हितमा नरहेको उनको दाबी छ । ‘हाम्रो पार्टी र यो देशको हितमा बीआरआईको ऋण छैन, यो लिन हुँदैन । अनुदान पनि हामीले धेरै गम्भीरतापूर्वक छलफल गरेर लिनुपर्छ । अनुदान र दिएको सहयोगको नियत के हो ? गम्भीर छलफल नगरी सहयोग पनि लिन हुँदैन,’– उनले भने ।
बीआरआई नेपालको आवश्यक्ता भन्दापनि चीनको रणनीतिक योजना रहेको उनको दाबी छ । व्यापकमात्रामा बहस र छलफल चलाएरमात्रै यो विषयमा निर्णय लिनुपर्ने उनको सुझाव छ । अहिले नेपालमा रहेका सबै चिनियाँ प्रोजेक्टहरु बीआरआईअन्तर्गतका हुन् भनेर भ्रम फैलाइएको भन्दै उनले असन्तुष्टि व्यक्त गरे । यदि चिनियाँ प्रोजेक्टहरु सबै बीआरआईअन्तर्गत हुन भने यो खतरनाक हुने उनको भनाइ छ ।
कुनै पनि देशसँग, दातृ संस्थासँग काम गर्नेक्रममा देशहित, राष्ट्रहित र जनहित सर्वोपरी स्थानमा राखेर सोच्नुपर्ने उनले बताए । नेपालका नेताहरुले कहिलेकाहीँ सम्झौता गर्दा देश र जनताको पक्षमा केही पनि नसोच्ने गरेको उनको आरोप छ । ‘कहिलेकाहीँ सम्झौता गर्दा हामी न देशहित हेर्छौं, न जनहित हेर्छौ, न राष्ट्रहित हेर्छौं । न हाम्रो आवश्यक्ता र शर्तलाई महत्व दिएका हुन्छौं,’– उनले भने ।
