काठमाडौं । नेपाल प्रिमियर लिगमा सुदूरपश्चिम रोयल्सले पोखरा एभेन्जर्सलाई १५४ रनको लक्ष्य दिएको छ ।
टस हारेर पहिले ब्याटिङ गरेको सुदूरपश्चिमले निर्धारि २० ओभरमा ७ विकेट गुमाएर १५३ रन जोड्यो ।
सुदूरका लागि आरिफ शेखले सर्वाधिक ४२ रन हिर्काए । ३८ बलको सामना गर्दै नटहाउट रहेका उनले २ चौका र एक छक्का हिर्काए । ब्रान्डन म्याकमुलेनले २३ रन थपेको खेलमा कप्तान दीपेन्द्रसिंह ऐरीले २० रन जोडे । विनोद भण्डारीले १४, हर्मित सिंहले १३ तथा स्कट कुगेलेइनले १० रन थपे ।
बलिङतर्फ पोखराका कप्तान कुशल भुर्तेलले सर्वाधिक २ विकेट लिए । त्यस्तै सागर ढकाल, रेमन रेइफर र माइकल लिस्कको नाममा पनि समान १ विकेट रह्यो ।
