काठमाडौं, १० माघ । राष्ट्रिय स्वतन्त्र पार्टी (रास्वपा) का सभापति, पूर्वउपप्रधान एवं गृहमन्त्री रवि लामिछानेविरुद्धको मुद्दामा थुनछेक बहस जारी रहेको छ । रुपन्देही जिल्ला अदालतका न्यायाधीश प्रल्हादकुमार योगीको इजलासमा लामिछानेविरुद्धको मुद्दामा थुनछेक बहस भइरहेको हो । अदालत स्रोतका अनुुसार थुनछेक बहस आज नसकिने निश्चित छ । बुटवलको सुप्रिम सहकारी ठगी प्रकरणमा प्रतिवादी रहेका लामिछाने हिजो (बुधबार) आफैं जिल्ला अदालतमा हाजिर भएका थिए । जिल्ला अदालले बयान गराएर लामिछानेलाई श्रीमती निकिता पौडेलको जिम्मा लगाएको थियो ।
सो मुद्दामा सरकारको तर्फबाट जिल्ला सरकारी वकिल कार्यालयबाट ५ जना र उच्च सरकारी वकिलको कार्यालय ३ जना गरी ८ जना सरकारी वकिलले बहस गर्ने भएका छन् । उच्च सरकारी वकिलको कार्यालय बुटवलबाट प्रमुख सहन्यायाधिवक्ता सोमकान्ता भण्डारी, उपन्यायाधिवक्ताद्वय प्रकाश मरासिनी र रवि न्यौपानेले बहस गर्दैछन् । सरकारी वकिल कार्यालय रुपन्देहीका प्रमुख प्रेमराज पौडेल, सहायक जिल्ला न्यायाधिवक्ताहरु गोकर्णराज घिमिरे, सुनिल लामिछाने, वसन्तराज पोख्रेल र पवित्रा भण्डारीले बहस गरिसकेका छन् ।
अझै सहकारी पीडितको तर्फबाट कानुन व्यवसायीहरुले बहस गर्न बाँकी नै छ । पीडितको तर्फबाट वरिष्ठ अधिवक्ताद्वय दिनेश त्रिपाठी र डा. सुरेन्द्र भण्डारीले बहस गर्नेछन् ।
लामिछानेलाई हिजो परिवारको जिम्मा लगाएको प्रति सरकारी वकिलहरुले इजलासमा आक्रोश व्यक्त गरेका छन् । लामिछानेलाई हिजो परिवारको जिम्मामा छाड्नुले थुनछेकको औचित्य नै समाप्त भएको भन्दै उनीहरुले न्यायाधीश योगीप्रति कटाक्ष गरे । सरकारी वकिलहरुले न्यायाधीश योगीले थुनछेकको विधिशास्त्र नै मिचेको संकेत गरे ।
बयान दिन आएको मान्छेलाई पुन परिवारको जिम्मा लगाएकोमा असन्तुष्टि व्यक्त गर्दै सरकारी वकिलले लामिछाने जोडिएको मुद्दा नहेर्न समेत न्यायाधीश योगीलाई सुझाए ।
