काठमाडौं ४ असार ।
गृह मन्त्रालयले तीनवटा प्रदेशमा हुने स्थानीय तहको निर्वाचनका लागि सुरक्षा तयारी पूरा भएको जनाएको छ । गृह प्रवक्ता दीपक काफ्लेले सबै मतदान केन्द्रमा नेपाली सेना, नेपाल प्रहरी, सशस्त्र प्रहरी र म्यादी प्रहरी गरेर १ लाख ६३ हजार ८ सय २३ सुरक्षाकर्मी परिचालन भइसकेको जानकारी दिए । आइतबार तीन प्रदेशका ३५ जिल्लाका ३ सय ३४ स्थानिय तहमा मनोनयन हुँदै छ ।
प्रवक्ता काफ्लेले निर्वाचन अधिकृत कार्यालयको सुरक्षाको पूर्ण तयारी सकिएको र निरन्तर सुरक्षा जानकारी अपडेट हुन थालिसकेको बताए । स्रोतका अनुसार मधेसका जिल्लाहरूमा निर्वाचन अस्वीकार गरिरहेको राजनीतिक शक्तिहरूले विरोध गर्ने र मनोनयन दर्तामा अवरोध गराउन सक्ने सम्भावनालाई मध्यनजर गरेर थप सुरक्षाकर्मी पठाइएको छ । मन्त्रालयले निर्वाचन सुरक्षाका निम्ति पूरक सुरक्षा योजना नै तयार गरेको छ । पहिलो चरणको निर्वाचन सुरक्षा योजनामा भएका कमजोरी र बदलिँदो राजनीतिक परिस्थितिअनुसार पूरक सुरक्षा योजना निर्माण गरिएको हो । गृहले सुरक्षा स्थितिको विश्लेषणका आधारमा केही जिल्लालाई संवेदनशील क्षेत्रका रूपमा हेरेको छ । सबै मतदान केन्द्रको छु्ट्टाछुट्टै सुरक्षा रणनीति तयार पारिसकेको छ । सामान्य, संवेदनशील र अति संवेदनशील भनेर छुट्याइएको मतदान केन्द्रमा त्यसैका आधारमा सुरक्षा रणनीति बनाइएको छ ।
प्रदेश २ को निर्वाचन सरेपछि गृहले उक्त प्रदेशमा खटिएका म्यादी प्रहरी र अन्य सुरक्षाकर्मीलाई निर्वाचन हुने प्रदेशमा सार्ने भएको छ । प्रवक्ता काफ्लेले एकै चरणको निर्वाचनका निम्ति भनेर ठूलो संख्यामा म्यादी र अन्य सुरक्षाकर्मी खटिने योजना बनाइएको बताउँदै भने, ‘निर्वाचन सुरक्षाका निम्ति पर्याप्त जनशक्ति तयार छ ।’ उनले निर्वाचन सुरक्षाको सम्पूर्ण तयारी सकिएको र निर्धक्क भएर चुनाव प्रक्रिया अगाडि बढाउन मन्त्रालय तयारी हालतमा रहेको बताए ।
त्यस्तै नेपाली सेनाका प्रवक्ता झंकर कडायतका अनुसार निर्वाचन सुरक्षा योजनाअनुसार सेनाले तोकिएको जिम्मेवारी बमोजिम दोस्रो चरणको निर्वाचनमा पनि सुरक्षा दिने बताए । उनले भने, ‘सेनाको तर्फबाट गर्नुपर्ने आवश्यक सम्पूर्ण तयारी भइसकेको छ ।’ कडायतले सबै निर्वाचन क्षेत्रमा सेना खटिसकेको जानकारीसमेत दिए । नेपाली सेनाले मतपत्र ओसार्ने र मतदान केन्द्रको बाहिरी घेराको सुरक्षा जिम्मेवारी सम्हाल्नेछ ।कान्तिपुरबाट
म्यादीको म्याद थपिँदै
तोकिएको समयमा राजनीतिक सहमति जुट्न नसकेपछि गृह मन्त्रालयले ५५ दिनको म्याद पाएका म्यादी प्रहरीको २० दिनको सेवा अवधि थपेको थियो । दोस्रो चरणको निर्वाचनअगावै असार ५ गते म्यादी प्रहरीको म्याद सकिने भए पनि शनिबारसम्म गृहले म्याद थपेको छैन । प्रवक्ता काफ्लेले करिब ७२ हजार म्यादी प्रहरीको म्याद थप्नेबारे गृहकार्य भइरहेको जानकारी दिए ।
