काठमाडौं, १६ माद्ध । किन लाग्छ माया निर्माण गरेको निर्माण टोलीले अहिले लम्फु निर्माण गरेको छ । नयाँ वर्षमा प्रदर्शनमा आउने लम्फुको अहिले प्रचार प्रसार तीव्र पारिएको छ । बैशाख २८ गतेलाई प्रर्दशन मिति तोकेको चलचित्र लम्फुले चारओटा गितको अडियो हालै सार्वजनिक गरेको हो ।
सार्वजनिक गरिएका चारैवटा गीतमा अर्जुन पोख्रेलले संगित दिएका छन् । ‘सँगै जिउने सँगै मर्ने’ बोल रहेको गीतमा दिग्गज धौरालीको शब्दमा सुरेश लामा र अप्सरा घिमिरेले स्वर दिएका छन् ।
त्यसैगरी अर्को गीत ‘तिमीलाई भुलेर’मा प्रमोद खरेलको स्वर र युवराज सापकोटाको शब्द रहेको छ, भने ‘चाहे गोजीमा सुक्कै नहोस् यार’मा शिब परियारको स्वर, प्रमोद ढुंगानाको शब्द र ‘दोधार दोधारैमा परे म’ मा दुर्गा खरेलको स्वर र नरेश भट्टराईको शब्द रहेको छ ।
पपुलर मल्टिमिडियाको ब्यानरमा निर्माण भएको यस चलचित्र लम्फुलाई गोपाल चन्द्र लामीछानेले निर्देशन गरेका हुन् । शक्ती बल्लब घोरासैनी निर्माता रहेको चलचित्र लम्फुमा सलोन बस्नेत, मरिस्का पोख्रेल, कबिर खड्का, चाँदनी शर्मा, कुशाग्र भट्टराई, कुसुम श्रेष्ठ तरकारीवाली, सञ्जिब भण्डारी लगायत कलाकारले मुख्य भुमिका रहेको छ ।
