काठमाडौं, २२ बैशाख । इन्डियन प्रिमियर लिग (आईपीएल) क्रिकेटमा गएराति भएको खेलमा मुम्बई इन्डियन्स विजयी भएको छ । किङ्स इलावेन पञ्जावलाई ६ विकेटले हराउँदै मुम्बईले अघिल्लो चरणमा पुग्ने सम्भावना कायम राखेको छ ।
इन्दोरमा भएको खेलमा जितका लागि पाएको १ सय ७५ रनको लक्ष्य मुम्बईले १९ ओभरमा ४ विकेट गुमाएर भेट्टायो । मुम्बईलाई जिताउन सूर्यकुमार यादवले ५७ रन बनाए ।
कप्तान रोहित शर्मा २४ तथा क्रुणाल पाण्डे ३१ रनमा नट आउट रहे । इशान किशानले २५ तथा हार्दिक पाण्डेले २३ रनको योगदान गरे । यसअघि टस हारेर पहिला ब्याटिङ गरेको पञ्जावले २० ओभरमा ६ विकेट गुमाउँदै १ सय ७४ रन बनाएको थियो ।
उसका लागि क्रिस गेलले ४० बलमा ५० रन बनाए । लोकेश राहुल २४ रन बनाएर आउट भए भने मार्कस स्टोइनिस २९ रनमा नट आउट रहे । पञ्जाबका युवराज सिंहले १४ रन बनाउँदा रनआउट भए ।
यो जितपछि ९ खेलबाट ६ अंक बटुलेको मुम्बई पाँचौ स्थानमा उक्लिएको छ । पञ्जावको भने ८ खेलबाट १० अंक छ र ऊ चौथो स्थानमा कायम छ ।
