झापा, ५ साउन । मजदूर नेता डिल्ली गौतमको २५ औँ स्मृति दिवसमा शुक्रबार कनकाई नगरपालिकामा भएको कार्यक्रममा सो क्षेत्रका एसइई परीक्षामा ए प्लस नतिजा ल्याउन सफल १७ जनालाई नगदसहित पुरस्कृत गरिएको छ ।
डिल्ली गौतम स्मृति प्रतिष्ठानको आयोजनामा भएको कार्यक्रममा उनीहरुलाई प्रदेश नं १ सरकारका संघीय मामिला तथा कानूनमन्त्री हिक्मत कार्कीले प्रतिव्यक्ति एक हजारसहित सम्मान गर्दै गौतमलाई राज्यका तर्फबाट शहीद घोषणा गर्न प्रक्रिया अघि बढाइसकिएको बताए ।
विसं २०५० साल जेठ ३ गते तत्कालीन नेकपा एमाले पार्टीका महासचिव मदन भण्डारी र नेता जीवराज आश्रितको मृत्युपछि घटनाको सत्यतथ्य छानवीन गरी दोषीलाई कारवाहीको माग गर्दै झापाको दमकमा गरिएको विरोधसभामा प्रहरीले गोली हान्दा गौतमको साउन ४ गते मृत्यु भएको थियो । उनकै स्मृतिमा १० महिलासहित ६९ जनाले रक्तदान गरेको प्रतिष्ठानका अध्यक्ष रवीन्द्र लम्सालले बताए ।
