भक्तपुर, २ भदौ । भक्तपुर भएर बग्ने हनुमन्ते नदी सफाइ अभियानको आज २५ औं हप्तामा ६ टन फोहर सङ्कलन गरिएको छ । मध्यपुृरथिमि नगरपालिकाको लोकन्थलीदेखि जडीबुटीसम्मको क्षेत्रमा भएको सरसफाइको आज नेपाल रेडक्रस सोसाइटी भक्तपुरका अध्यक्ष मनोजकुमार थापाले शुभारम्भ गरेका छन ।
कार्यक्रममा प्रतिनिधिसभा सदस्य महेश बस्नेतले हनुमन्तेमा फोहर फाल्ने कामलाई अब सधैँको लागि बन्द गर्नुपर्ने बताउँदै हनुमन्ते करिडोर निर्माण सम्पन्न भएसँगै ढल खोलामा बग्न बन्द हुने बताए ।
सूर्यविनायक नगरपालिकाको नेतृत्वमा शुरु भएको अभियानमा जिल्लाका विभिन्न सङ्घ संस्था, नगरपालिका, विद्यालय, स्थानीय बासिन्दा र अभियन्ताको सक्रिय सहभागिता रहेको नगरपालिकाका प्रमुख वासुदेव थापाले जानकारी दिएका छन।
सन् २०७५ लाई हनुमन्ते सफाइ वर्ष घोषणा गर्दै शुरु भएको अभियानमा आजसम्म करीब २६६ टन फोहर सङ्कलन भएको र अहिलेसम्मको अभियानमा ३७० जनाको प्रत्यक्ष सहभागिता रहेको हनुमन्ते सफाइ अभियानका अभियन्ता पुष्कर गजुरेलले जानकारी दिएका छन । रासस
