काठमाडौं । अभिनेता तथा मोडल प्रशान्त तम्राकार, पुर्व मिस नेपाल तथा अभिनेत्री उषा खड्गी, आयुसी शाहलगायत नेपालका करिब आधा दर्जन मोडल एकसाथ सम्मानित हुने भएका छन् ।
नेपाल राष्ट्रिय मोडलिङ संघले आगामी शनिबार होटल अन्नपुर्णमा आयोजना गर्न लागेको ‘सर्जक सम्मान २०७५’ मा उनीहरुलाई सम्मान दिइने भएको हो ।
कार्यक्रममा मोडलका साथै अभिनेता/अभिनेत्री, गायक-गायिका, संगीतकार, चलचित्रका निर्देशक, पत्रकार, सौन्दर्य ब्यवसायीका साथै राष्ट्रियस्तरका खेलाडीलाई पनि सम्मान गरिनेछ ।
बिभिन्न क्षेत्रमा रहेर एक दशकभन्दा बढि समय बिताएका ब्यक्तिलाई ‘सर्जक सम्मान २०७५’ बाट सम्मानित गर्न लागेको आयोजक नेपाल मोडलिङ संघका केन्द्रीय अध्यक्ष दिनेश शाहीले बताए ।
अमेरिकामा पनि साखा बिस्तार गरेको खुसी साट्ने उद्देश्यले आयोजना गर्न लागिएको कार्यक्रममा संघले आगामी नोभेम्बरमा अमेरिकामा आयोजना हुने नेपाल मोडलिङ अवार्ड २०७५ को पनि बिभिन्न पक्षबारे जानकारी गराउने जनाएको छ ।
ललितपुरको कुपन्डोलमा रहेको नेपाल मोडलिङ संघले अमेरिकाको ब्रुमफिल्ड कोलराडोमा नवराज श्रेष्ठको अध्यक्षमा आफ्नो शाखा बिस्तार गरेको हो । श्रेष्ठ युएसए चलचित्र संघका अध्यक्ष पनि हुन् ।
देशको सातै प्रदेशमा शाखा बिस्तारको तयारीसमेत गरेको संघले अमेरिकाको शाखासँगको सहकार्यमा अमेरिकामा अवार्ड गर्न लागेको हो । मोडलिङमा लागेकालाई प्रेरणा र हौसला प्रदान गर्ने उदेश्यले संघले अवार्ड आयोजना गर्न लागेको अध्यक्ष श्रेष्ठले जानकारी दिए ।
